ՀՀ վարչապետի հարցը կլուծի ՌԴ-ն

Ոչ իշխանական չորս ուժերի միջև կա համախմբվելու գործընթաց, բայց դեռևս վերջնական համախմբում չկա: Այս մասին Լուրեր.com-ի հետ զրույցում ասաց քաղաքական և ընտրական տեխնոլոգիաների փորձագետ Արմեն Բադալյանը:

Վերջինիս խոսքով` համախմբումը կոնկրետ գործողությունների շուրջ է իրականանում, մասնավորապես` խորհրդարանում տեղի ունեցած գազի արձանագրությունների ճշտության հետ կապված հարցում, բայց կառավարության հրաժարականի հարցում, ըստ Բադալյանի, դեռևս համախմբվածություն չկա, այլ ընթանում է գործընթաց, որը կարող է հանգեցնել նրանց համախմբմանը և, բնականաբար, եթե հանգեցրեց, նրանք շատ հավանական է` մտնեն Ազգային ժողով` կառավարությանն անվստահություն հայտնելու հարցով:

«Բայց մենք պետք է հաշվի առնենք մի հանգամանք, որն ինչպես շատ մեկնաբաններ ևս նշում են, Հայաստանի ինքնիշխանության մակարդակն այնքան է իջել, որ սեպտեմբերի 3-ից հետո վարչապետի փոփոխության հարցը կարող է լուծվել, եթե այն հավանություն ստանա ՌԴ-ի կողմից: Ինչու, որովհետև մենք տեսնում ենք, թե ՌԴ-ն ինչպիսի կտրուկ քայլերով է պաշտպանում իր ազգային շահը հենց թեկուզ Ուկրաինայի հարցում»,-ասաց Բադալյանը:

Փորձագետը նշեց, որ եթե Հայաստանի ոչ իշխանական ուժերը ցանկանում են կառավարության հրաժարականին հասնել և նոր կառավարություն ձևավորել, ապա առնվազն վարչապետի թեկնածության հարցը պետք է հավանություն ստանա Ռուսաստանի իշխանությունների կողմից:

«Իսկ, թե ՌԴ-ն իր հավանությունը կտա, թե չի տա, մենք դա, բնականաբար, չենք կարող գուշակել: Հայաստանի հասարակությունը չունի այլևս այն հզորությունը, և ՀՀ-ն ինքնավար երկիր չէ, որը թույլ կտա իր հասարակությանը` հաշվի չառնելով աշխարհաքաղաքական կենտրոններին, այստեղ իշխանություն ձևավորել այդ թվում` և′ նոր կառավարություն, և′ նոր վարչապետ նշանակել: Պետք է մի բան ևս նշենք, որ կառավարության և վարչապետի փոփոխության նկատմամբ, բնականաբար, անտարբեր չի կարող մնալ արևմուտքը և այդ թվում` ԱՄՆ-ն: Ճիշտ է` ՌԴ-ն կարող է հավանություն տալ, որ փոխվի կառավարությունը, բայց դեռևս չի նշանակում, որ դրան կարող է հեշտությամբ համաձայնվել արևմուտքը և այստեղ խնդիրներ կարող են առաջանալ»,-ասաց փորձագետը:

Արմեն Բադալյանը նշեց նաև, որ ինչքան էլ ՀՀ-ի չորս ոչ իշխանական ուժերը փորձեն միավորվել և այդ հարցի շուրջ ընդհանուր տեսակետ ձևավորել, իրենք չունեն համապատասխան իրավական գործընթացը դա հաջողությամբ պսակելու համար. «Որովհետև իրավական գործընթացը հետևյալն է. չորս ուժերը մտնում են ԱԺ և կառավարությանը փորձում են հայտնել անվստահություն, և դրա համար անհրաժեշտ է ԱԺ-ի մեծամասնության համաձայնությունը, իսկ այսօր ԱԺ-ում մեծամասնություն են ՀՀԿ-ն և ՕԵԿ-ը, որոնք ԱԺ-ում ունեն 77 պատգամավոր և եթե նրանք դեմ լինեն կառավարության փոփոխմանը` ոչ իշխանական ուժերի ձայների քանակը չի բավարարի»,-ասաց Բադալյանը: