Ուկրաինայի վերաբերյալ Հայաստանի դիրքորոշումը հավասարակշիռ է և բխում է տեղի հայության շահերից. քաղաքագետ

Հայաստանի պաշտոնական դիրքն` Ուկրաինայում տեղի ունեցող իրադարձությունների վերաբերյալ, ոչ միայն ճիշտ է, այլև կշռադատված: «Կովկաս ինստիտուտի փոխտնօրեն, քաղաքագետ Սերգեյ Մինասյանի գնահատմամբ' Հայաստանի արտաքին գործերի նախարարության հայտարարությունն այն մասին, որ Հայաստանը կհամագործակցի Ուկրաինայում իշխանության եկած ուժի հետ, խոսում է այն մասին, որ պետությունն առաջին հերթին մտածում է Ուկրաինայում բնակվող ավելի քան հարյուր հազար հայերի մասին»:

«Չպետք է մոռանալ, որ Ուկրաինայում բնակվում է հարյուր հազար հայ և պետությունը պետք է հոգ տանի նրանց մասին: Նրանք տարբեր տեսակետներ ունեն երկրում տեղի ունեցող իրավիճակի վերաբերյալ, իսկ պետությունը պետք է այնպիսի քաղաքականություն տանի, որպեսզի չվտանգի նրանց ապահովությունն ու հետագա անվտանգությունը»,-«Արմենպրես»-ի հետ զրույցում ասաց Սերգեյ Մինասյանը' հիշեցնելով, որ նույն քաղաքականությունը Հայաստանը վարում էր ավելի քան երկու տարի Սիրիայում տեղի ունեցող բախումների ժամանակ' հաշվի առնելով Սիրիայում հարյուր հազարավոր հայերի ներկայությունը: Քաղաքագետին զարմացնում է, որ այդ ժամանակ Հայաստանի չեզոք և հավասարակշռված դիրքորոշումը քննադատության չէր արժանանում, իսկ Ուկրաինայի պարագայում տարատեսակ խոսակցությունների առիթ հանդիսանում:

Անդրադառնալով մի շարք քաղաքագետների ներկայացրած տեսակետին, որ Ղրիմի անկախություն ստանալը կարող է լուրջ նախադեպ հանդիսանալ նաև Լեռնային Ղարաբաղի անկախության համար, քաղաքագետն ասաց, որ դրանք ընդամենը քարոզչական խոսակցություններ են: Նա հիշեցրեց, որ ի տարբերություն աշխարհում առկա մի քանի տասնյակ հակամարտությունների և վերջերս անկախություն ստացած մի շարք պետությունների, Լեռնային Ղարաբաղի Հանրապետությունն իրավական առումով ունի բոլոր փաստաթղթերը, որոնք վկայում են երկրի անկախ և սուվերեն լինելը:

«Եթե ուսումնասիրենք փաստաթղթղերը, ապա կհամոզվենք, որ ԼՂՀ-ի անկախությունը իրավական առումով և բոլոր փաստաթղթղերով համապատասխանում է Խորհրդային Միության օրենքներին և դրույթներին: Իրավական նման բազա չունի ո'չ Կոսովոն, ո'չ Աբխազիան, Հարավային Օսիան կամ անկախության համար պայքարող Շոտլանդիան: Հետևաբար, իրավական առումով ԼՂՀ-ն ապացուցելու ոչինչ չունի: Այստեղ ընդամենը գոյություն ունի քաղաքականություն, քաղաքական կամք և խաղեր, և վերոնշյալ մի շարք երկրների անկախություն ստանալը հենց այդ ոլորտից է: Ինչ վերաբերում է ԼՂՀ-ի և Ղրիմի հետ համեմատություններին, դրանք դատարկ խոսակցություններ են»,-ասաց քաղաքագետը:

Ուկրաինայում լարված իրավիճակն ազդեցություն է թողել Ղրիմի Ինքնավար Հանրապետության վրա: Ղրիմում իրավիճակը լարվեց, երբ Կիևում «մայդանի» հայտնի իրադարձություններից հետո փոխվեց իշխանությունը, նախկին նախագահ Վիկտոր Յանուկովիչի նկատմամբ հետախուզում հայտարարվեց և նա գաղտնի կերպով տեղափոխվեց Ռուսաստան: Սիմֆերոպոլում տեղի ունեցավ միանգամից երկու հանրահավաք և փողոց դուրս եկան եվրոպական և ռուսական ուղղվածություն ունեցող բնակիչները: Մարտի 6-ին Ղրիմի խորհրդարանը միաձայն որոշում կայացրեց ինքնավորության' ՌԴ կազմում ընդգրկվելու վերաբերյալ: Ղրիմում տեղի ունեցող իրադարձությունների պատճառով լարվել են Արեւմուտքի և Ռուսաստանի հարաբերությունները: Հայաստանում մի շարք քաղաքագետներ տեսակետ են հայտնում, որ Ղրիմի անկախություն ստանալը կարող է դրական ազդեցություն ունենալ և նպաստել Լեռնային Ղարաբաղի անկախության ճանաչմանը: