«Համասյանն այն երաժիշտն է, որ անդադար կարող ես լսել ու չձանձրանալ». Տիգրան Համասյանի մենահամերգը կայացավ (ֆոտո)

Երեկ` մարտի 6-ին, Արամ Խաչատրյան մեծ համերգասրահը լեփ-լեցուն էր. անվանի ջազ դաշնակահար Տիգրան Համասյանի մենահամերգն էր:

Հանդիսականների շարքում էին ինչպես Հայաստանի, այնպես էլ սփյուռքի մեր հայրենակիցները: 

Շուրջ երեք ժամ ընթացող համերգում հնչեցին Համասյանի հայտնի ստեղծագործությունները, ինչպես նաև կոմիտասյան մշակումների թեմաներով ջազային իմպրովիզացիաներ: Ողջ համերգի ընթացքում հայտնի գյումրեցին հանդիսատեսին պահեց հաճելի լարվածության մեջ: 

Նշենք, որ մենահամերգը տևեց նախատեսվածից ավելի երկար. հանդիսատեսի բուռն ու հոտընկայս ծափերը ջազմենին վերադարձրին բեմ և ներկաները ևս մեկ անգամ հնարավորություն ունեցան վայելելու այս անգամ դաշնամուրային կատարումը:

Հիշեցնենք, որ ջազմենի նախորդ համերը Երևանում տեղի էր ունեցել նախորդ տարեվերջին` դեկտեմբերի 14-ին, որի ժամանակ էլ ներկայացվել էր երաժիշտի «Ստվերների թատրոն» ալբոմը: 

Համերգի ավարտից հետո Լուրեր.com-ի թղթակիցը զրուցեց երաժշտի երկրպագուներից մեկի հետ, ով հիացած էր մատուցված բարձրաճաշակ երաժշտությամբ: Մեր զրուցակիցը մեծ ցավ էր ապրում, որ Հայաստանում անկում է ապրել երաժշտության մակարդակը և իսկական արվեստ շատ քիչ է մատուցվում հանդիսատեսին. «Համասյանն այն երաժիշտն է, որ անդադար կարող ես լսել ու չձանձրանալ: Ցավոք, հաճախ չենք կարողանում կենդանի կատարմամբ լսել նրան, շատ կցանկանամ, որ նա հաճախ այցելի Հայաստան»:

{gallery}tigranham{/gallery}

Լուսանկարները` համերգի կազմակերպիչ TM Productioni-ի