Հայաստանն ինտեգրման իր ընտրությունը կատարում է առաջնորդվելով ազգային շահով. Վազգեն Մանուկյան

Մաքսային միությանը միանալու որոշման կայացման ժամանակ Հայաստանն առաջնորդվել է պրագմատիկ շահերով և անվտանգության նկատառումներով, որոնք կարևոր են ոչ միայն Հայաստանի, այլև ողջ տարածաշրջանի և եվրոպական տարածքի համար: Այս մասին հայտարարել է ՀՀ հանրային խորհրդի նախագահ Վազգեն Մանուկյանը ռումինական AGERPRES լրատվական գործակալությանը տված հարցազրույցում: «Եվ Եվրոպական մայրաքաղաքներում և Բրյուսելում ըմբռնումով են մոտենում Հայաստանի որոշմանը: Մաքսային միությանը միանալու որոշմանը զուգահեռ, Հայաստանի նախագահ Սերժ Սարգսյանը հայտարարեց միաժամանակ ԵՄ համագործակցությունից չհրաժարվելու մասին: Մենք այս երկու ուղղություններից մեկ մյուսից չենք գերադասում: Վիլնյուսում Հայաստանի և ԵՄ միջև ստորագրվեց համատեղ հռչակագիր, հույս ունենք մինչև այս տարվա վերջ կսահմանենք համագործակցության պարագծերը' հաշվի առնելով նոր իրողությունները»,-ասել է Մանուկյանը:

Նա ընդգծել է, որ երբ Հայաստանի անկախությունից հետո նոր պետություն էր կառուցվում, երկիրն ընտրեց եվրոպական պետության մոդելը և դրանից չի շեղվելու: «Բարեբախտաբար, մենք տեսնում ենք, որ մեր շուրջն էլ գնում են այդ ուղղությամբ, որը ապագայի նկատմամբ հույս է ներշնչում»,-նկատել է Հանրային խորհրդի նախագահը:

Ինչ վերաբերում է Եվրասիական միությանը, ապա չի բացառվում տնտեսական վիթխարի ներուժով օժտված եվրասիական հսկա տարածքի վրա ԵՄ մոդելով նման միության կամ միությունների ստեղծումը: Ժամանակակից գլոբալացման պայմաններում վերջիվերջո դա է ապագան, և պետք չէ խանդով նայել որևէ մեկին: «Հայաստանը, ելնելով իր ազգային շահերից և աշխարհագրական յուրահատուկ դիրքից, փորձելու է առավելագույնս ինտեգրվել համաշխարհային այդ համակարգերին»,-ընդգծել է Մանուկյանը:

Մաքսային միության անդամներն են Ռուսաստանը, Բելառուսն ու Ղազախստանը: 2013թ. սեպտեմբերի 3-ին Մոսկվայում ՀՀ նախագահ Սերժ Սարգսյանը հայտարարեց, որ Հայաստանը ցանկանում է անդամագրվել Մաքսային միությանը: Հայաստանի վարչապետը հայտարարել է, որ երկիրն իրականացրել է ՄՄ-ին անդամակցության ճանապարհային քարտեզի միջոցառումների 50 տոկոսը:

Հայաստանը միևնույն ժամանակ հայտարարել է, որ կշարունակի համագործակցությունը Եվրամիության հետ. 2013թ. նոյմեբերին Վիլնյուսյան գագաթնաժողովի ընթացքում ընդունվեց համատեղ հայտարարություն' արտահայտելով հետագա ինտեգրումը շարունակելու պատրաստակամություն: