Հայաստանը շահագրգիռ է բարեկամ և հարևան Վրաստանի կայունությամբ. Վազգեն Մանուկյան

Հայաստանի շահերից է բխում իր վաղեմի բարեկամ և հարևան Վրաստանը տեսնել կայուն և զարգացած երկիր: Այս մասին հայտարարել է ՀՀ հանրային խորհրդի նախագահ Վազգեն Մանուկյանը ռումինական AGERPRES լրատվական գործակալությանը տված հարցազրույցում: «Վրաստանի ցանկացած ընտրության դեպքում մենք պատրաստ ենք ամենասերտ հարաբերություններ զարգացնել նրա հետ»,-ասել է Մանուկյանն ի պատասխան Վրաստանի' ԵՄ-ի հետ ասոցացման համաձայնագրի նախաստորագրման և այդ երկրում Ուկրաինական սցենարի կրկնության մասին հարցին: «Ես կարծում եմ, որ Վրաստանի և Ուկրաինայի վիճակները տարբերվում են իրարից: Վրաստանում օրինական ձևով, ընտրությունների միջոցով ձեւավորվել են իշխանություններ, որոնք վայելում են վրաց հասարակության մեծամասնության վստահությունը: ԵՄ Ասոցացման համաձայնագրի վերաբերյալ այնտեղ չկան ներքին հակասություններ: Չեմ կարծում, թե կլինեն նաև արտաքին ճնշումներ, ընդհակառակը, այսօր Վրաստանը և Ռուսաստանը քայլեր են ձեռնարկում կարգավորելու իրենց հարաբերությունները»,-նկատել է Մանուկյանը:

Վրաստանը 2013թ. նոյեմբերին Վիլնյուսի գագաթնաժողովին նախաստորագրել է Ասոցացման համաձայնագիրը, իսկ Ուկրաինան հենց նույն գագաթնաժողովում հրաժարվել է ստորագրել փաստաթուղթը: Դա այդ երկրում դժգոհության ալիք է բարձրացրել, ինչ էլ հանգեցրել է «մայդանի» իրադարձություններին, բախումների, ավելի քան 80 մարդու մահվան և իշխանափոխության: