Մի մասը` կրակողի, մյուսը` ընդդիմադիրի կողմում

ԱԺ չորս ոչ իշխանական ուժերի միավորումը չի հանգեցնի իշխանափոխության: Այս մասին Լուրեր.com-ի հետ զրույցում ասաց «Քրիստոնեա-ժողովրդական վերածնունդ» կուսակցության նախագահ Սոս Գիմիշյանը:

Վերջինիս խոսքով` այդ քաղաքական ուժերն իշխանություն եղել են, ժողովրդի վստահությունը պարբերաբար ունեցել են և հիասթափեցրել:

«Անարդյունք է եղել նրանց գործունեությունը: Մի մասն առաջին իշխանության մեջ են եղել, մյուս մասը` վերջին իշխանության, էլ չեմ ասում` պարբերաբար 1998 թվականից այս կողմ այդ նույն ուժերը տարբեր անգամներ ընտրություններում ժողովրդի վստահության քվեն են ստացել և որևիցե արդյունք չեն կարողացել ապահովել: Նրանք նաև շատ տարբեր են, չնայած բոլոր այդ ուժերը արևմտամետ են, բայց իրենք տարբեր են: Ի վերջո, 2008 թվականին այդ ուժերի կեսը եղել է բարիկադի այն կողմում՝ կրակողների, իշխանություն են ներկայացրել, մեկն ընդդիմություն է եղել, մասնավորապես` ՀԱԿ-ը: «Ժառանգությունն» այս վերջին ընտրություններում ժողովրդի բուռն աջակցությունը ստացավ և անարդյունք: Իրենք մի անգամ չէ, որ ժողովրդի հույսերը տապալել են, եթե կես միլիոն ժողովուրդ էր կանգնած, չկարողացան ոչինչ անել, հիմա ինչո՞ւ պետք է ժողովուրդն իրենց վստահի»,-ասաց Գիմիշյանը:

Նա նշեց, որ հիմնական հույսերը կապում է ազատամարտիկների գործունեության հետ:

«Իշխանափոխությունն անհրաժեշտ է Հայաստանում և ի վերջո իշխանափոխություն տեղի կունենա: Հիմնական հույսերս ազատամարտիկների գործունեության հետ եմ կապում»,-ասաց կուսակցության նախագահը:

Սոս Գիմիշյանի կարծիքով` այդ չորս ուժերը Սերժ Սարգսյանի «ձեռքից են ստացել մանդատները և իշխանության համար հարմար ընդդիմություն է դա: Իշխանությունն է ձևավորել այդ ընդդիմությունը խորհրդարանում և հասարակության վստահությունը չի կրել: Իհարկե, ժողովուրդն ընդդիմադիր է տրամադրված, կյանքը ծանր է, ինչ-որ միտինգների ժողովուրդը կգնա էլի, որովհետև դժգոհությունը մեծ է»,-ասաց Գիմիշյանը` հավելելով, որ ինքը չի տեսնում չորս ուժերի միջև քաղաքական և բարոյական համագործակցության հիմքեր: