«Հայոց ցեղասպանության միջազգային ճանաչման համար բեկումնային կլինի ԱՄՆ-ի կողմից ճանաչումը». թուրքագետ

Միջազգային իրավիճակն ու տարածաշրջանային իրադրությունը նպաստավոր չեն Հայոց ցեղասպանության միջազգային ճանաչման համար: Թուրքագետ Հակոբ Չաքրյանի գնահատմամբ, Հայոց ցեղասպանության 100-ամյա տարելիցին ընդառաջ միջազգային հանրության ուշադրության կենտրոնում այլ երկրներ են. իրավիճակը բավական թեժ է Ուկրաինայում, հետեւաբար, գերտերությունների օրակարգային խնդիրը Եվրոպայի ամենամեծ պետությունում խնդիրների կա րգավորումն է: Սակայն դրան զուգահեռ, թուրքագետը Հայաստանի համար Անկարայի հետ կապված դրական տեղաշարժ է համարում, որ Անգելա Մերկելը եւ Ֆրանսուա Օլանդը հայտարարություններ կատարեցին եւ Թուրքիային հիշեցրեցին պատմական անցյալը:

Թուրքագետը կարծում է, որ մինչեւ 2015թ. նման հայտարարությունները կշարունակվեն, սակայն Հայոց ցեղասպանության միջազգային ճանաչման համար բեկումնային կլինի միայն Ամերիկայի Միացյալ Նահանգների կողմից դրա ճանաչումը. դրան կհաջորդի Մեծ Բրիտանիայի եւ Իսրայելի կողմից ճանաչումը, ինչը լիարժեք կդարձնի ճանաչման գործընթացը: Սակայն, ըստ Չաքրյանի' ԱՄՆ-ն չի ճանաչի Հայոց ցեղասպանությունը, քանի որ դա իր հերթին կբերի մեծ պատասխանատվության: «ԱՄՆ-ն աշխարհի միակ լիարժեք գերտերությունն է, եւ նման ճանաչումը կնշանակի հետեւանքների վերացման վերաբերյալ պատասխանատվության ստանձնում եւ պարտադրում: Բացի այդ, եթե ԱՄՆ-ն ճանաչի Հայոց ցեղասպանությունը, ապա Թուրքիայի նկատմամբ ազդեցության լծակը կկորցնի: Իսկ ԱՄՆ-ն չի ցանկանա ինքնակամ ձեռքից վայր դնել այդ լծակը»,- ասաց Չաքրյանը:

Թուրքագետի գնահատմամբ' Հայոց ցեղասպանության ճանաչումը կամրապնդի Հայաստանի դիրքերը միջազգային հանրության տեսադաշտում: Նրա խոսքերով' Թուրքիան եւ Ադրբեջանը, որն այս հարցում սատարում է իր ավագ եղբորը, վարկանիշային անկում կունենան, ինչը նպաստավոր կլինի նաեւ Լեռնային Ղարաբաղի հակամարտության կարգավորման համար:

Չաքրյանի գնահատմամբ, Թուրքիայում նույնպես Հայոց ցեղասպանության հարյուրամյա տարելիցը մեծ օրակարգում չէ, քանի որ ներքաղաքական խնդիրներն ավելի շատ են, եւ այսօր Թուրքիայի իշխանությունների ուշադրության կենտրոնում այդ հարցերի կարգավորումն է:

Հայոց Ցեղասպանությունը ХХ դարի առաջին ցեղասպանությունն է։ Թուրքիան մերժում է Առաջին համաշխարհային պատերազմի տարիներին մոտ մեկուկես միլիոն հայերի զանգվածային ջարդեր իրականացնելու մեղադրանքները և չափազանց ցավագին է վերաբերվում Հայոց Ցեղասպանության հարցի վերաբերյալ Արևմուտքի քննադատություններին։ Հայոց ցեղասպանության փաստը ճանաչել են 20-ից ավելի երկրներ, այդ թվում' Ուրուգվայը, Լիտվան, Ռուսաստանը, Ֆրանսիան, Իտալիան, Գերմանիան, Նիդերլանդները, Սլովակիան, Շվեդիան, Շվեյցարիան, Հունաստանի, Կիպրոսի, Արգենտինայի, Բելգիայի խորհրդարանները, Կանադայի խորհրդարանի Համայնքների պալատը և Լեհաստանի Սեյմը, Վատիկանը, ԱՄՆ 42 նահանգներ, Եվրախորհդարանը, Եկեղեցիների համաշխարհային խորհուրդը։