ԲՀԿ-ական պատգամավորը ոչ մի վատ բան չի տեսնում Ապարանում ՀԷԿ-ի կառուցման մեջ

Ապարանի ջրամբարի վրա ՀԷԿ-ի կառուցումը ոչնչի չի վնասի: Անրհրաժեշտ է ուշադրություն դարձնել տարածքի հնամյա ընկուզենիների ճակատագրին: Մարտի 7-ին լրագրողների հետ հանդիպմանն այդ մասին նշեց ՀՀ Ազգային Ժողովի ԲՀԿ խմբակցության պատգամավոր Լյովա Խաչատրյանը:

Պատգամավորը նշեց, որ մարդկանց անհանգստության պատճառը անորոշությունն էր: «Ժողովուրդը տեղյակ չէր, թե ինչ էին կառուցում: Նրանց բողոքն արդարացի էր: Տեղի իշխանությւոնը կարծես ծաղրեր մարդկանց. Մեկն ասում էր ՀԷԿ են կառուցում, մյուսն ասում էր' ՀԷԿ չեն կառուցում»,- ասաց Խաչատրյանը' հավելելով, որ գյուղացիները ցանկանում են, որ ամեն ինչ օրենքով լինի:

«Եթե ՀԷԿ են կառուցում, ապա պետք է լինեն ուսումնասիրությունների արդյունքներ, հասարակական քննարկումներ: Թող բնապահպանները, փորձագետները իրենց եզրակացությունը տան, ինչից հետո հավաքեն մարդկանց և բացատրեն, որ ՀԷԿ-ի կառուցումը ոչ մի բացասական ազդեցություն չունի շրջակա միջավայրի վրա, իսկ դրականն այն է, որ ՀԷԿ-ի տերը տարեկան գումար է վճարելու համայնքին»,- ասաց պատգամավորը:

Գյուղացիների մտավախությունն այն է, որ ՀԷԿ-ի կառուցման պարագայում իրենք կզրկվեն ջրից: «Ներկայումս գյուղացիները ջուրը վերցնում են արագահոսից և ոռոգում շրջակա այգիները, քանի որ ջրագծի որոշակի հատված չի աշխատում: Դա ապօրինի է: Արագահոսը վերանորոգման կարիք ունի և հայտնվել է մի անհատ ձեռներեց, որը արագահոսի վերանորոգելուն զուգահեռ միգուցե ՀԷԿ կառուցի: Սակայն ջրագիծը և արագահոսը մնալու են, և գյուղացիները շարունակելու են այդտեղից ջուր վերցնել: Ոչ ոք չի կարող դա արգելել, քանի որ ջրագիծը կառավարությանն է պատկանու մ»,- նշեց Խաչատրյանը:

Պատգամավորի խոսքով' նա հանդիպել է փոխվարչապետ Արմեն Գևորգյանին և քննարկել ՀԷԿ-ի կառուցման դրական և բացասական կողմերը: Փոխվարչապետը որոշել է հատուկ հանձնաժողով կազմել, որն էլ կուսումնասիրի հարցը և կհայտնի արդյունքները: Այժմ ՀԷԿ-ի շինարարության համար բերված տեխնիկան հեռացրել են: