Վերին Կարմիրաղբյուր գյուղում փնտրում են հնարավոր գերի Արսեն Խոջայանին

Տավուշի մարզից հայ-ադրբեջանական սահմանը մարտի 7-ին հատած քաղաքացին զիծառայող չէ: «Արմենպրես»-ի թղթակցի հարցին ի պատասխան` այս մասին տեղեկացրեց ՀՀ պաշտպանության նախարարության մամուլի խոսնակ Արծրուն Հովհաննիսյանը: Ինչպես ադրբեջանական լրատվամիջոցներն են հաղորդում, սահմանը հատել է 22-ամյա Արսեն Խոջայանը:

Տավուշի Վերին Կարմիրաղբյուր գյուղի գյուղապետ Կամո Չոբանյանի խոսքով` իրենց գյուղում նման անուն-ազգանունով քաղաքացի ապրում է: «Այդ անուն-ազգանունը համընկնում է: Հիմա մենք փորձում ենք ճշտել` արդյոք մեր համագյուղացի՞ն է, թե ոչ»,- ասաց Կամո Չոբանյանը:

ՀՀ ոստիկանության հասարակայնության հետ կապերի եւ լրատվության վարչության աշխատակից Արմեն Մալխասյանի խոսքով' իրենք դեռևս Արսեն Խոջայան անուն-ազգանունով քաղաքացու անհետ կորելու վերաբերյալ հաղորդում չեն ստացել: Կարմիր խաչի միջազգային կոմիտեի ներկայացուցիչ Զառա Ամատունին նշեց, որ իրենք, հիմք ընդունելով Ադրբեջանի Գերիների, պատանդների ու անհայտ կորածների պետական հանձնաժողովի քարտուղարի հաղորդած տեղեկատվությունն ադրբեջանական լրատվամիջոցներին, սկսել են լրջորեն հետազոտել հարցը: Ադրբեջանական xezerxeber.az կայքն արդեն հրապարակել է սահմանն անցած ՀՀ քաղաքացու լուսանկարը, որը քաղաքացիական հագուստով է, իսկ Ադրբեջանի Գերիների, պատանդների ու անհայտ կորածների պետական հանձնաժողովի քարտուղար Շահին Սայիլովի խոսքերով՝ նա ծնվել է 1991-ին, անուն-ազգանունը՝ Արսեն Խոջայան։