Հրանտ Թոխատյանը, Ռիտա Սարգսյանի թույլտվությամբ, զանգահարեց Սերժ Սարգսյանին

Կանանց միջազգային օրը` մարտի 8-ը, Ալ. Սպենդիարյանի անվան օպերայի և բալետի ազգային ակադեմիական թատրոնում միավորեց տարբեր ոլորտներ ներկայացնող շուրջ 1000 կանանց, ովքեր ներկա գտնվեցին ՀՀ նախագահի տիկին Ռիտա Սարգսյանի կողմից կազմակերպված տոնական համերգին: Միայն կին հանդիսատես ունեցող համերգի յուրաքանչյուր մանրուք մանրակրկիտ էր մտածված` սկսած յուօրինակ հրավիրատոմսերից:

Տոնական համերգը լի էր նաև անսպասելի անակնկալներով: Հաղորդավար Հրանտ Թոխատյանը հայտարարեց փոքրիկ-խաղ մրցույթի մասին, որի ընթացքում նախքան համերգը կատարված հարցման արդյունքում ընտրվել էր այն տասը տղամարդկանց ցանկը, ում զանգելով Թոխատյանը խնդրում էր բարեմաղթանք հղել դահլիճում ներկա կանանց, ինչպես նաև մատնանշել պարտերից, ամֆիթատրոնից կամ օթյակից այն պատահական նստատեղի համարը, որը դառնալու էր մրցանակի հաղթող:

Ընտրված տղամարդկանց ցանկում էին ջազմեն Լևոն Մալխասյանը, Հայասանի պետական ֆիլհարմոնիկ նվագախմբի գեղարվեստական գեղավար և գլխավոր դիրիժոր Էդուարդ Թոփչյանը, գինեկոլոգ Գեորգի Պողոսյանը, Մարքսիստական կուսակցության նախագահ Դավիթ Հակոբյանը, ԱԻՄ առաջնորդ Պարույր Հայրիկյանը: Որքան էլ զարմանալի թվա, ցուցակը ավարտվում էր ՀՀ նախագահ Սերժ Սարգսյանի անունով:

Թոխատյանը, ՀՀ առաջին տիկին Ռիտա Սարգսյանի թույտվությամբ, զանգահարեց նաև երկրի ղեկավարին: Նրա քարտուղարուհին թեպետ զարմացավ, սակայն համաձայնեց միացնել հեռախոսագիծը նախագահին: Սարգսյանը չմերժեց խաղին մասնակցելու առաջարկը` մաղթելով կանանց անսաման սեր, անձնական երջանկություն և նորանոր հաջողություններ: Անակնկալը մեծ խանդավառություն առաջացրեց դահլիճում:

Տոնական միջոցառումն անմասն չմնաց նաև հումորից, որը ապահովեցին հաղորդավար Աշոտ Ղազարյանը, Նարեկ Դուրյանը, Գրիշա Աղախանյանը, ինչպես նաև «Վիտամին» ակումբի տղաները:

Երեկոյին ներկա էին նորանկախ Հայաստանի երեք` ներկա և նախկին երկու նախագահների տիկնայք, ինչպես նաև այլ բարձրաստիճան կին գործիչներ:

Տոնական միջոցառումը եզրափակվեց տոնական համերգին մասնակից բոլոր տղամարդկանց համատեղ ելույթով: Համերգի ավարտին` օպերային թատրոնից դուրս գալու պահին, յուրաքանչյուր իգական սեռի ներկայացուցչի անակնկալ էր սպասվում ծաղիկների տեսքով: