Գյումրեցի զոհված ազատամարտիկների ընտանիքները կհանգստանան Սև ծովի ափին

Գյումրեցի զոհված ազատամարտիկների ընտանիքի անդամներին Սև ծովի ափին հանգստանալու 1- շաբաթյա անվճար ուղեգիր տրամադրելու ծրագիր է իրականացվում: Բարեգործական այս ակցիան իրականացվում է Գյումրու «ԱՐՏ» կազմակերպության կողմից՝ «Հատուցում» ծրագրի շրջանակում:

«ԱՐՏ» կազմակերպությունը նմանատիպ ակցիա անցկացնում է արդեն չորրորդ անգամ: Տարբեր տարիներին բարեգործական այս ակցիային աջակցել են տարբեր անհատներ և կազմակերպություններ: Այս անգամ ծրագրին աջակցել է Շիրակի մարզպետ Ֆելիքս Ցոլակյանը: Ինչպես «Արմենպրես»-ին տեղեկացրեց Շիրակի մարզպետարանի աշխատակազմի տեղեկատվության և հասարակայնության հետ կապերի պատասխանատու Սամվել Գրիգորյանը, «ԱՐՏ» կազմակերպության տնօրեն Արտյոմ Թումանյանն ակցիային աջակցելու խնդրով դիմել էր Շիրակի մարզպետին»: Շիրակի մարզպետ Ֆելիքս Ցոլակյանը գյումրեցի 50 ազատամարտիկի ընտանիքների անդամների մեկշաբաթյա հանգստի ակցիային աջակցելուն իր համաձայնությունը տվեց: Ավելին' որոշվեց նրանց մի մասին՝ 10 ազատամարտիկի ընտանիքի, հաճելի անակնկալը հանձնել կանանց նվիրված տոնին՝ հնարավորություն ունենալով տոնի առթիվ շնորհավորելու զոհված ազատամարտիկների կանանց և մայրերին»,-նշեց Սամվել Գրիգորյանը: Զոհված ազատամարտիկների ընտանիքներին հավաստագրերն անձամբ հանձնել են «ԱՐՏ» կազմակերպության տնօրեն Արտյոմ Թումանյանը, ԵԿՄ Շիրակի խորհրդի նախագահ Յուրա Ալեքսանյանը, ԵԿՄ Գյումրու խորհրդի նախագահ Վարդան Սարգսյանը և Շիրակի մարզպետարանի աշխատակազմի տեղեկատվության և հասարակայնության հետ կապերի պատասխանատու Սամվել Գրիգորյանը:

Մարզի մյուս զոհված ազատամարտիկների ընտանիքների անդամներին հավաստագրերը կտրամադրվեն փոքր-ինչ ավելի ուշ՝ համայնքների ղեկավարների հետ ծրագրի իրականացման համար համապատասխան գործընթացի ավարտից հետո: