Ջավախահայությունը շարունակում է հույսեր կապել Վրաստանի իշխանությունների հետ

Ջավախքում առկա խնդիրները բազմաթիվ են և որքան էլ Վրաստանի իշխանությունները փորձում են լուծումներ տալ դրանց, որոշ հարցեր շարունակում են չլուծված մնալ: Այս մասին «Արմենպրես»-ի հետ զրույցում ասաց ԱԺ ՀՀԿ խմբակցության պատգամավոր, «Վիրահայերի միասնություն» հասարակական կազմակերպության նախագահ Տաճատ Վարդապետյանը, ով վերջերս է վերադարձել Ջավախքից: «Այն նախընտրական խոստումները, որ դեռևս Վրաստանի խորհրդարանական ընտրություններից առաջ տվել էին «Վրացական երազանք» քաղաքական ուժի ներկայացուցիչները, շատ դանդաղ են իրագործվում: Ճիշտ է, խորհրդարանական ընտրություններից հետո, երբ «Վրացական երազանքը» հաղթեց և մեծամասնություն կազմեց, երկրի նախագահը շարունակում էր մնալ Միխեիլ Սաակաշվիլին և երկրում երկիշխանության մթնոլորտ էր, սակայն հիմա էլ, երբ այդ մթնոլորտն այլևս չկա, Ջավախքում առկա խնդիրների լուծմանն ուղղված աշխատանքները շատ դանդաղ են ընթանում»,-ասաց Վարդապետյանը:

Անդրադառնալով Ջավախք կատարած այցին՝ Տաճատ Վարդապետյանն ընդգծեց, որ եղել է Նինոծմինդայում և Ախալքալաքում, որտեղ Վրաստանում ՀՀ արտակարգ և լիազոր դեսպան Հովհաննես Մանուկյանի հետ պատվոգրեր են հանձնել մի շարք մտավորականների: «Դրանից հետո մենք ժամանեցինք Թիֆլիս, որտեղ Վիրահայոց թեմը բարեկենդանի արարողություն էր նախաձեռնել և մասնակցեցինք «Հարիսայի փառատոնին»: Թիֆլիսում նույնպես պատվոգրերի հանձնման արարողություն տեղի ունեցավ: Այնպես որ կարող ենք փաստել, որ Ջավախքում կյանքն աստիճանաբար ավելի է ակտիվանում, սակայն խնդիրներ կան և դրանք շատ են»,-ասաց Վարդապետյանը:

Պատգամավորի խոսքով՝ իրենք չեն կորցրել հույսը, որ Վրաստանի իշխանությունները կակտիվացնեն քայլերը' Ջավախքում բարեփոխումներ իրականացնելու նախընտրական խոստումներն իրականություն դարձնելու համար: Այս համատեքստում Վարդապետյանն անդրադարձավ Վրաստանի նախագահ Գիորգի Մարգվելաշվիլիի` Հայաստան կատարած այցին, որի ընթացքում Վրաստանի նախագահը ոչ միայն պետական մակարդակով հանդիպումներ է անցկացրել, այլ նաև կոլորիտային հանդիպում, երբ Էջմիածնում հանդիպել էր իր ընկերոջը, որին ճանաչում է դեռ բանակի տարիներից: «Այս քայլով Մարգվելաշվիլին ցույց տվեց, որ չի մոռացել իր հայ բարեկամներին: Բացի դրանից, որքան հաճախ են լինում երկու բարեկամ ժողովուրդների բարձրաստիճան պաշտոնյաների պետական մակարդակով հանդիպումներն, այնքան ավելի շատ խնդիրներ են լուծում ստանում, և այս առումով մենք հույս ունենք, որ առաջիկայում նոր քայլեր կիրականացվեն ջավախահայության խնդիրների լուծման ուղղությամբ»,-ասաց Վարդապետյանը:

Պատգամավորն անդրադարձավ ևս մեկ տհաճ միջադեպի, որը հաջորդել էր Վրաստանի նախագահի՝ Հայաստան կատարած այցելությանը: Վրաստանում persona non grata է ճանաչվել ծնունդով ջավախքցի, մտավորական Վահե Սարգսյանը: Տաճատ Վարդապետյանը նշեց, որ սա իսկապես մտահոգիչ է և երկու բարեկամ ժողովուրդների միջև նման բաներ չպետք է տեղի ունենան: «Այս հարցով մտահոգված էր նաև Վրաստանի խորհրդարանի պատգամավոր Ռուսլան Պողոսյանը, ով ևս Ջավախքից է: Հույս ունեմ, որ նման տհաճ միջադեպեր այլևս չեն լինի»,-նշեց նա:

Տաճատ Վարդապետյանը նաև մասնակցել է ՀՀ վարչապետ Տիգրան Սարգսյանի և Վրաստանի նախագահ Գիորգի Մարգվելաշվիլիի պաշտոնական ճաշին: «Աշխատանքային ճաշն անցավ ջերմ և եղբայրական մթնոլորտում»,-ասաց Վարդապետյանը:

Վրաստանի նախագահ Գիորգի Մարգվելաշվիլին փետրվար 27-ին ին երկօրյա պաշտոնական այցով ժամանել էր Հայաստան ՀՀ նախագահ Սերժ Սարգսյանի հրավերով: ՀՀ նախագահ Սերժ Սարգսյանի հետ հանդիպման ժամանակ Մարգվելշվիլին նշել է, որ ՀՀ-ի նախագահի հետ հանդիպման ընթացքում կարևորվել է հայ ժողովրդի դերը Վրաստանի քաղաքական, տնտեսական, մշակութային ոլորտների զարգացման գործում: Սերժ Սարգսյանը կարևորել երկու երկրների միջև անվտանգության ոլորտում համագործակցությունը' հավելելով, որ վրացի գործընկերոջ հետ ձեռք է բերել պայմանավորվածություն' միջազգային հարթակներում զգայուն հարցերի վերաբերյալ ցուցաբերելու երկկողմ հավասարակշռված դիրքորոշում: