Յուրաքանչյուր երեխա պետք է ապրի ընտանիքում

Հայաստանում երեխաների պաշտպանության ոլորտում նախաձեռնվել են բարեփոխումներ, որոնց նպատակն է ստեղծել պայմաններ, որպեսզի յուրաքանչյուր երեխա ապրի ընտանիքում կամ ընտանեկան միջավայրում: Մարտի 10-ին Երևանում անցկացվում է «Երեխաների իրավունքների պաշտպանության համակարգի բարեփոխումներ. հնարավորություններ, մարտահրավերներ և հեռանկարներ» թեմայով համաժողով:

ՀՀ աշխատանքի և սոցիալական հարցերի նախարար Արտեմ Ասատրյանը լրագրողների հետ զրույցում նշեց, որ երեխաների պաշտպանության ոլորտում նախաձեռնվում են բարեփոխումներ, որոնց նպատակն այն է, որ յուրաքանչյուր երեխա իրավունք ունի ապրել ընտանիքում: «Ոլորտում մեր խնդիրները, համեմատած այլ երկրների հետ, միգուցե, այնքան էլ սուր չեն, բայց մենք ունենք խնդիրներ, որոնք պետք է լուծումներ ունենան, և այդ խնդիրները բավական մանրամասնորեն վեր են հանվել մեր նախարարության, UNICEF-ի և ԱՄՆ Միջազգային զարգացման գործակալության աջակցությամբ և, ամենակարևորը, առաջադրվել են լուծումները»,- նշեց Ասատրյանը՝ հավելելով, որ մեծ ինստիտուցիոնալ կառույցները տարիներ շարունակ խնամք են ապահովում երեխաների համար, սակայն հոգածության այդ տեսակն այլևս ընդունելի չի համարվում: «Երեխաները պիտի մեծանան ընտանիքում և ընտանեկանին մոտ միջավայրում, իսկ դրա համար անհրաժեշտ է, որպեսզի զարգացվեն այլընտրանքային ծառայությունները»,- ասաց նախարարը՝ նկատի ունենալով խնամակալության և որդեգրության ինստիտուտները: Ասատրյանը նշեց մանկատների բեռնաթափման անհրաժեշտության մասին: Նրա խոսքով` կյանքի դժվարին իրավիճակում հայտնված ընտանիքների երեխաները պետք է ոչ թե անմիջապես հայտնվեն ինստիտուցիոնալ հաստատություններում, այլ անհրաժեշտ է նրանց այլընտրանքային ծառայություններ տրամադրել, որպեսզի չհայտնվեն այնտեղ:

ԱՄՆ ՄԶԳ առաքելության ղեկավար Քարեն Հիլիարդը նշեց, որ բոլոր անհրաժեշտ միջոցներն առկա են, որպեսզի փոփոխություններ կատարվեն երեխաների պաշտպանության ոլորտում և ստեղծվեն հնարավորություններ, որպեսզի նրանք ապրեն ընտանիքներում: «Մենք հավատում ենք, որ այդ օրն այսօր է, և հիմա է այդ խնդիրը լուծելու ժամանակը»,- նշեց Հիլիարդը՝ մեջբերելով ԱՄՆ նախագահ Բարաք Օբամայի ասույթներից, թե փոփոխություն չի լինի, եթե մենք սպասենք այլ մարդու կամ ժամանակի: «Մենք ենք այն մեկը, ում սպասում ենք: Մենք ենք փոփոխությունը»,- նշեց Հիլիարդը:

ՄԱԿ-ի մանկական հիմնադրամի հայաստանյան գրասենյակի ղեկավար Հենրիետ Արենսը նշեց, որ UNICEF-ն աջակցում է երեխաների պաշտպանության ոլորտի բարեփոխումներին, որոնցից են ինստիտուցիոնալ վերափոխումները: «Մենք ցանկանում ենք աջակցել հայաստանցիներին, որպեսզի նրանք ունենան երջանիկ և որպեսզի նրանց երեխաներն ապրեն ընտանիքներում»,- ասաց Արենսը:

ՀՀ ազգային վիճակագրական ծառայության տվյալներով` 2013 թվականին կենտրոնական հաշվառման վերցված որդեգրման ենթակա երեխաների թիվը 103 է:

Անցյալ տարի Հայաստանում որդեգրվել է 55 երեխա, որոնցից 34-ը կամ ընդհանուր թվի 62 տոկոսը՝ արտերկրում բնակվող օտարերկրյա քաղաքացի ընտանեկան զույգերի կողմից: