Առաջիկայում Հայաստան կայցելի Սերբիայի նախագահը

Հայերն ու սերբերը վաղեմի, դարավոր ընկերներ են: Սերբիայում ապրում են հայեր, որոնց սերբ ժողովուրդը ընկալում է որպես հարազատի: Մարտի 10-ին Երևանում Հայաստանի արտգործնախարար Էդվարդ Նալբանդյանի հետ համատեղ մամուլի ասուլիսում Սերբիայի արտգործնախարար Իվան Մկրկիչը շեշտեց, որ Սերբիայի արտաքին քաղաքականությունը պետք է արտահայտի այս զգացմունքները: Իվան Մրկիչը նշեց, որ հարաբերությունների զարգացմանը կնպաստի նաև առաջիկայում Սերբիայի նախագահի այցը Հայաստան: Սերբիայի արտգործնախարարի խոսքերով' Երևանում իրեն զգում է ինչպես «բարեկամի տանը» և շնորհակալ է ջերմ ընդունելության համար: «Մեզ անհրաժեշտ է իրավական-պայմանագրային դաշտ' համգործակցությունը զարգացնելու համար և այդ ուղղությամբ աշխատանքներ իրականացվում են»,- նշեց սերբ նախարարը:

ՀՀ արտաքին գերատեսչության ղեկավար Էդվարդ Նալբանդյանի խոսքով էլ սերբ նախարարի հետ հանդիպման ընթացքում քննարկվել են երկկողմ հարաբերությունները, տարածաշրջանային և միջազգային օրակարգի հարցեր: Նալբանդյանի ներկայացմամբ' առավոտյան կնքվել է կրկնակի հարկման բացառման համաձայնագիրը և այսպիսով երկրների միջև համաձայնագրերի թիվը դարձել է 6: Ըստ Նալբանդյանի' պայմանագրային-իրավական բազայի կատարելագործման տեմպերը դանդաղ են, սակայն կան շատ նախագծեր տարբեր բնագավառներում: «Հնարավոր համագործակցության բնագավառները շատ են' զբոսաշրջությունը, արդյունաբերությունը, բանկային գործը»,- ասաց Նալբանդյանը' հավելելով, որ մարտի 11-ին կկայանա հայ-սերբական գործարար համաժողովը, ինչը նույնպես կնպաստի երկկողմ տնտեսական համագործակցության զարգացմանն ու առևտրաշրջանառությանը:

Սերբ նախարարը Հայաստանում գտնվում է պաշտոնական այցով: Այցի ընթացքում հանդիպումներ են նախատեսված ՀՀ նախագահի, վարչապետի, Ամենայն հայոց կաթողիկոսի հետ: Նախարարը կայցելի նաև Ցեղասպանության զոհերի «Ծիծեռնակաբերդ» հուշահամալիր: Մարտի 11-ին Երևանում կկայանա հայ-սերբական գործարար համաժողով: