Երիտասարդ գիտնականներին աջակցություն կցուցաբերվի նաև գիտական սարքավորումների և նյութական ձեռքբերման հարցում

ՀՀ նախագահի հովանու ներքո իրականացող «Երիտասարդ գիտնականների աջակցության ծրագիրը» 2014 թվականին կնեկայանա նոր ուղղություններով: Մարտի 10-ին հրավիրված ասուլիսում Հայաստանի երիտասարդական հիմնադրամի հոգաբարձուների խորհրդի համակարգող Կարեն Ավագյանը հայտնեց, որ նոր ուղղությունները, մասնավորապես, երիտասարդ գիտնականներին գիտական սարքավորումների և նյութական ձեռքբերման հարցում աջակցությունն է:

«Նոր ուղղությունների շրջանակում շուրջ 700 գիտնականններ հնարավորություն կունենան ձեռք բերել նյութատեխնիկական սարքավորումներ, հրատարակել գիտական հոդվածներ, ինչպես նաև միջազգային փոխհարաբերություններ հաստատել»,-տեղեկացրեց Ավագյանը:

Նա նշեց, որ դեռևս 2011 թվականին որպես ֆեյսբուքյան նախաձեռնություն ձևավորված և արդեն 2012 թվականի հուլիսի 1-ից ՀՀ նախագահի հովանու ներքո իրականացվող ծրագրի դրական արդյունքներն իրենց երկար սպասել չտվեցին:

Ավագյանն ընդգծեց, որ եթե 2012 թվականին ծրագրի բյուջեն կազմում էր 100 միլիոն դրամ, ապա մեկ տարի անց բյուջեն նախագահի կողմից կրկնապատկվել է' հասնելով 200 միլիոն դրամ:

«Այդ 200 միլիոն դրամի շնորհիվ գիտնականներն այսօր հնարավորություն ունեն հոգալ գործուղումների, գիտական տարբեր կոնֆերանսների կազմակերպման, ինչպես նաև մրցանակաբաշխության անցկացման ծախսերը»,-նշեց հոգաբարձուների խորհրդի համակարգողը:

«Երիտասարդ գիտնականների աջակցության ծրագրի» շրջանակում 2013 թվականի հուլիսի 1-ից դեկտեմբերի 31-ը մրցութային հիմունքներով երիտասարդ գիտնականներին միջազգային գիտական գործուղումների համար ֆինանսավորվել է 33 հայտ:

Նույն ժամանակահատվածում գիտաժողովների, սիմպոզիումների, սեմինարների կազմակերպման գումար է հատկացվել 11 հայտի:

Համաֆինանսավորման սկզբունքով Գիտության պետական կոմիտեի և Հայաստանի երիտասարդական հիմնադրամի հետ համատեղ իրականացվել է «Երիտասարդ գիտաշխատողների հետազոտությունների աջակցության ծրագիր-2013» մրցույթը, որտեղ երիտասարդ գիտնականների աջակցության ծրագրի ներդրումը հասարակական բնագավառում մեկ գիտական խմբի ֆիննասավորումն է. 2 տարվա համար' 9 միլիոն դրամ:

2013 թվականին իրականացվել է գիտական լրագրության մրցույթ, որի արդյունքում հաղթող են ճանաչվել 10 լրագրող:

Հայ օգնության ֆոնդի և կրթության հայկական ազգային հիմնադրամի հայտարարած մրցույթի շրջանակում երիտասարդ գիտնականների աջակցության ծրագրին 2014 թվականի փետրվարին տրամադրվել է լրացուցիչ 5 դրամաշնորհ' յուրաքանչյուրը 5-ական հազար ԱՄՆ դոլարին համարժեք դրամ: