Հայկական հետախուզությունը վերահսկում է Ադրբեջանի ԶՈւ հրամանատարության հեռախոսազրույցները. ադրբեջանցի փորձագետ

Հայկական հետախուզությունը լսում է Ադրբեջանի բանակի ղեկավարության հեռախոսները: Դա է եղել պատճառը, որ ադրբեջանական բանակում արգելվել է սպաներին օգտվել բջջային հեռախոսներից: «Ենի Մուսավաթը» հայտնում է, որ Ադրբեջանում սենսացիա առաջացրած նման հայտարարությամբ հանդես է եկել ռազմական փորձագետ Ուզեիր Ջաֆարովը' Ֆեյսբուքի իր էջում արած գրառման մեջ:

Նա նշել է, որ Ադրբեջանի ՊՆ ղեկավարության, ինչպես նաև մարտական գոտու շրջաններում տեղակայված միավորումների և զորամասերի հրամատարների հետ ճակատային գծում պաշտպանության նախարար Զաքիր Հասանովի օրերս անցկացրած կարևոր խորհրդակցության ամբողջ մանրամասները հայկական կողմը լսել է և երկրի ղեկավարությանը հայտնել այդ հանդիպման բոլոր դետալները:

«Այդ գաղտնի հանդիպման բոլոր դետալների մասին հայկական կողմի տեղեկացվածությունը շշմեցրել է Ադրբեջանի գեներալներին: Հետո հայտնի է դարձել, որ հայկական կողմն այդ խորհրդակցությանը հետևել է բջջային հեռախոսակապի միջոցով և վերծանել»,-գրել է փորձագետը:

Ու. Ջաֆարովը հեգնանքով գրել է, որ դրանից հետո «մարտական գործողություն տեսած» նախարարը հրամայել է ՊՆ-ում ծառայության ժամանակ արգելել բջջային հեռախոսները: «Այժմ ՊՆ համակարգում խիստ «օպերատիվ» աշխատանքային ոճ է տիրում: Առավոտյան ծառայության ներկայանալու ժամանակ ամբողջ անձնակազմից հարկադրաբար հավաքում են հեռախոսները: Բայց մի քանի հոգի, այդուհանդերձ, պահպանել են այդ հեռախոսներից օգտվելու իրավունքը: ՊՆ-ում լավ գիտեն, թե ովքեր են նրանք»,-նշել է նա:

Ռազմական փորձագետը գտնում է, որ կարևոր որոշումները և ռազմական գաղտնիքները պահպանելու համար ցածրաստիճան սպաներից և ենթասպաներից, այդ թվում զինվորներից կամ սերժանտներից, հեռախոսները հավաքելը, իսկ բարձրաստիճան սպաների համար նման արտոնության ճանաչումն անարդյունավետ է:

Ադրբեջանի ՊՆ մամուլի ծառայությունը ժամանակ առաջ հայտնել էր, որ Հայաստանի և Լեռնային Ղարաբաղի Հանրապետության ու ադրբեջանական զորքերի շփման գծում ծառայություն կատարող Ադրբեջանի զինված ուժերի սպաների և ենթասպաների համար սահմանափակումներ են մտցվել բջջային հեռախոսների օգտագործման վրա: Ըստ հաղորդագրության` նշված սահմանափակումները մտցվել են այդ զինվորական մասերում «գաղտնիության համապատասխան մակարդակն ապահովելու համար»: Բջջային հեռախոսների օգտագործման վրա դրված սահմանափակումները չեն տարածվում Ադրբեջանի ԶՈւ այլ զորամասերի զինծառայողների վրա: