Էդվարդ Նալբանդյանը վերջակետ է դրել Ուկրաինայի դեպքերի առնչությամբ Հայաստանի դիրքորոշման շահարկումներին

Ուկրաինայի վերաբերյալ Հայաստանի դիրքորոշումն ակնհայտ է և արտահայտվել է երկրի նախագահի շուրթերից: Հայաստանը հույս է հայտնել, որ կձեռնարկվեն համապատասխան միջոցառումներ խաղաղ ճանապարհով խնդրի լուծումը գտնելու համար: ԱԳՆ-ում Սերբիայի արտաքին գործերի նախարար Իվան Մրկիչի հետ համատեղ ասուլիսի ժամանակ ՀՀ արտաքին գործերի նախարար Էդվարդ Նալբանդյանը ևս մեկ անգամ ներկայացրեց Հայաստանի դիրքորոշումը' հույս հայտնելով, որ որ մոտ ժամանակահատվածում կողմերը կկարողանան երկխոսել և նպաստել լարվածության թուլացմանն ու գտնել կուտակված հարցերի պատասխանները: Անդրադառնալով խոսակցություններին, որ Հայաստանը Ուկրաինայի դեսպանատանը բացված սգո մատյանում գրառում չի թողել, Էդվարդ Նալբանդյանն ասաց, որ դրանք անտեղի և անիմաստ շահարկումներ են, որովհետև արտաքին գործերի նախարարությունն իր խոսնակի միջոցով հայտնել է ցավակցություն Ուկրաինային և Ուկրաինայի ժողովրդին: «Դա եղել է այդ սգո մատյանի բացումից մեկ-երկու օր առաջ: Սգո մատյանի բացման կապակցությամբ արտգործնախարարությունը նոտա է ստացել Երևանում Ուկրաինայի դեսպանությունից, որը մուտքագրվել է փետրվարի 24-ին' սգո մատյանի բացման հաջորդ օրը»,-ասաց Նալբանդյանը' հավելելով, որ նույն օրը Ուկրաինայի դեսպանի հետ հեռախոսազրույց է ունեցել արտգործնախարարության ներկայացուցիչը, և դեսպանն ըմբռնումով է մոտեցել, քանի որ հայտագիրն, իրոք, ուշացումով է ստացվել:

Ի պատասխան, արդյո՞ք Ուկրաինայի հարցը քննարկվում է ՀԱՊԿ շրջանակներում և ինչպիսին է Հայաստանի դիրքորոշումն այդ հարցում, Նալբանդյանն ասաց, որ գերադասում է չխոսել այդ հարցի շուրջ: Ըստ նրա՝ ՀԱՊԿ շրջանակներում քննարկվում են բազմաթիվ հարցեր և երբ այդ թեմային նվիրված քննրակումներ լինեն, այդ ժամանակ էլ կարելի է խոսել դրանց մասին:

Ուկրաինայում տեղի ունեցած «մայդանային» հեղաշրջումից հետո իրավիճակը շարունակում է թեժ մնալ: Արդեն մի քանի օր է` անհանգիստ է նաև Ղրիմի Ինքնավար Հանրապետությունում, որի խորհրդարանը ՌԴ-ի կազմ մտնելու որոշում է կայացրել և ինքնավարության ճակատագրի վճռումը թողել մարտի 16-ին: Այդտեղ միաժամանակյա հանրահավաքներ են անցկացրել ռուսական ու արևտմտյան ինտեգրման կողմնակիցները: ՌԴ Նախագահ Վլադիմիր Պուտինը մարտի 1-ին դիմել է Դաշնային Խորհրդին՝ ԶՈՒ-ն Ուկրաինայի տարածքում օգտագործելու հարցով և ստացել աջակցություն: Պուտինը հետագայում հայտարարել է, որ Ռուսաստանն Ուկրաինա զորք մտցնելու հնարավորություն ունի, բայց առայժմ անհրաժեշտություն չի տեսնում: