«Պետք է բարձր վճարեն, որպեսզի աշխատեմ իրենց հետ». Վիկա Մարտիրոսյանն` իր աշխատանքի մասին

Վերջին շրջանում հայաստանյան շոուբիզնեսյան իրականության մեջ իր ուրույն տեղն է գրավել «Ամարաս» պարային համույթը: Ամարասցիներին կարելի է տեսնել միայն հայկական ամենապահանջված երգիչների թանկարժեք տեսահոլովակներում: Ինչպե՞ս է ստեղծվել համույթը, ովքե՞ր են հիմնադիրները և որքա՞ն պետք է վճարել' նրանց հետ աշխատելու համար: Այս և այլ հարցերի շուրջ MediaMall.am-ը զրուցեց Վիկա Մարտիրոսյանի հետ:

-Ե՞րբ և ի՞նչ պայմաններում ստեղծվեց «Ամարասը», ովքե՞ր էին հիմնադիրները և ինչո՞ւ այն կոչվեց հենց «Ամարաս»:

- «Ամարաս» համույթը ստեղծվել է ուղիղ տասնութ տարի առաջ: Հիմնադիրները ծնողներս են: Խմբի անունը որոշել է հայրս' Արցախում գտնվող եկեղեցու անունով: Հայրս կարդացել էր այդ եկեղեցու պատմությունը և շատ տպավորված էր, այդ իսկ պատճառով խումբը կոչվել է «Ամարաս»:

- Ի՞նչ ճանապարհ է անցել համույթը, և ո՞րն է եղել ամենամեծ հաղթահարած խոչընդոտը կայացման ճանապարհին:

- Փառք Աստծո, շատ դժվարին խոչընդոտներ չեն եղել: Խումբն այսօր կայացած է իր բարի համբավի, սրտացավ աշխատանքի շնորհիվ: Մեզ մոտ տարբեր տարիքային խմբեր են: Ծնողները, բերելով իրենց երեխաներին' գիտեն, որ նրանք հուսալի ձեռքերում են:

-Ինչպե՞ս է կատարվել խմբում ներկայումս պարող աղջիկների ընտրությունը:

-Ներկայումս աղջիկներն ութն են: Նրանց մի մասը փոքր հասակից պարել է հայրիկիս մոտ: Կան աղջիկներ, որ եկել են սիրողական պարի դասընթացների և այնքան են աշխատել, որ այսօր պարում են խմբում, երկուսն էլ այլ խմբերից են եկել և ցանկություն են հայտնել մեզ հետ աշխատելու:

-Երբվանի՞ց եք զբաղվում պարարվեստով:

- Ես մեծացել եմ արվեստագետների ընտանիքում, իմ ծնողները, հարազատները զբաղվել են պարարվեստով, ինձ փոխանցվել է նրանց տաղանդը, սերը դեպի պարը: Այդ իսկ պատճառով ես ընդունվեցի Պարարվեստի ուսումնարանի դասական պարերի բաժին:

- Ձեզ միշտ կարելի է տեսնել կայացած երգիչների տեսահոլովակներում: Ի՞նչ արժե «Ամարասի» մեկ համարը:

- Անկեղծ ասաց, ես ճիշտ չեմ համարում խոսել այդ մասին, քանի որ երգիչների հիմնական մասն իմ շատ սիրելի ընկերներն են և նրանց հետ աշխատելիս գումարայինը երբեք չեմ կարևորել: Ինձ համար կարևոր է լինել մեր ընկերների կողքին, օգնել նրանց՝ ինչով որ կարող ենք: Իսկ այն երգիչները, որոնց հետ աշխատանքս զուտ գործնական է, բնականաբար, պետք է բարձր վճարեն, որպեսզի աշխատեմ իրենց հետ:

-Ի՞նչ տվեց Վիկա Մարտիրոսյանին հայտնի լինելը:

- Նոր ուժ, նոր եռանդ, ապացույց մի շարք չար մարդկանց, որ կարելի լինել միշտ առաջինը, կարելի է լինել սիրված, պահանջված:

-Ձեր մաղթանքը կանանց' միամսյակի շրջանակներում:

-Աստված թող միշտ պահապան լինի մեր գեղեցկուհի հայ աղջիկներին, մայրերին, տատիկներին, թող միշտ ժպտան ու լինեն երջանիկ: