«Ժողովուրդ». «Հայաստանի էլեկտրական ցանցեր» ընկերությունում ֆինանսական ստուգումներ են սկսվել

Մեր տեղեկություններով, «Հայաստանի էլեկտրական ցանցեր» ընկերությունում ֆինանսական ստուգումներ են սկսվել: ՓԲԸ-ի աշխատողները խոսում են այն մասին, որ «Ցանցերի» սեփականատերը՝ «ԻՆՏԵՌ ՌԱՕ ՅԵ ԷՍ» ընկերությունը, նպատակ ունի պարզել դրանց իրական վիճակը, ֆինանսական հոսքերի չափերը: Ինչպես հաղորդում է «Ցանցերին» մոտ կանգնած «Ժողովուրդ»-ի աղբյուրը, ՀԷՑ-ում սպասվում էր նաեւ, որ գույքագրում պետք է անցկացվի, ինչը, սակայն, դեռ չի արվել: Այսպիսով, չնայած «Ցանցերի» ղեկավարությունը ժխտում է դրանց մոտալուտ սնանկացման մասին վերջերս ակտիվորեն շրջանառվող լուրերը, դրանք այնքան էլ անհիմն չեն: Սա հաստատում է նաեւ այն, որ մոդեռնիզացման պատրվակով «Ցանցերի» տարբեր ստորաբաժանումներում աշխատողներին ստիպում են դիմումներ գրել:

Հիշենք, թե ինչպես ՀԷՑ ղեկավար Բիբինն անցյալ տարվա նոյեմբերին փորձեց կազմալուծել խոշոր սպառողների դեպարտամենտը, աշխատողներին ցրելով մասնաճյուղերի վրա, ինչը չհաջողվեց Պուտինի այցից առաջ նրանց բարձրացրած աղմուկի պատճառով: Առայժմ չհաջողվեց: Մի քանի օր առաջ տեղեկացրել էինք նաեւ, թե ինչպես էին «Մուսալեռ» բաժանմունքի ղեկավարները անվանափոխության պատրվակով ստիպել աշխատողներին ազատման դիմումներ գրել: Ի դեպ, աշխատանքը կորցնելու վտանգի առաջ կանգնած աշխատողները «բացահայտում» են համակարգի համար անցանկալի գաղտնիքները: Մասնավորապես, ըստ նրանց, հունվար-փետրվար ամիսներին էլեկտրաէներգիայի սպառման սովորականից բարձր ցուցանիշները բացատրվում էին զանգվածային հավելագրումներով: Ավելացնելով սպառված էլեկտրաէներգիայի ծավալները, թվերն ուռճացնելով, ինչից սպառողների շրջանում մեծ դժգոհություն կար, ընկերությունում հույս ունեին «փակել» համակարգի կորուստները, այն ավելի շահեկան ներկայացնել հնարավոր գնորդի համար: 

Շարունակությունը` «Ժողովուրդ»-ի այսօրվա համարում: