Մայիսին Ստեփանավանի մոտակայքում անտառ կտնկվի սփյուռքահայ զույգի հիշատակին

Ընթացիկ տարվա մայիսին Լոռու մարզի Ստեփանավան քաղաքի մոտակայքում կյանքի կկոչվի 50 հազար ծառից բաղկացած անտառ-հուշահամալիրի նախագիծը: Անտառը կնվիրվի Ամերիկայից հայրենադաձված և վաղաժամ կյանքից հեռացած Սոսե Թովմասյանի և Ալեն Եկիկյանի հիշատակին: «Արմենպրես»-ի հետ զրույցում այս մասին տեղեկացրեց «Հայաստանի ծառատունկ ծրագիր» բարեգործական կազմակերպության հասարակայնության հետ կապերի բաժնի պատասխանատու Արմինե Թոխմախյանը: «Սոսեի և Ալենի հիշատակի անտառի ստեղծման ակցիան բարեհաջող ընթացք ունեցավ, «Ֆեյսբուք»-ում սահմանված ժամկետից ավելի շուտ կարողացանք հավաքել 10 հազար և ավելի հավանություն («լայք») ու շուտով կյանքի կկոչենք 50 հազար ծառ տնկելու նախագիծը: Ծառատունկը կմենարկի մայիսին, որպեսզի եղանակային առումով խնդիրներ չառաջանան»,-ասաց նա:

Անտառը կտնկվի Ստեփանավան քաղաքի մոտակայքում և, Արմինե Թոխմախյանի խոսքով, կպաշտպանի քաղաքը քամիներից: «Անտառի տեղն այնպես է որոշված, որպեսզի հետագայում այն պարսպի դեր կատարի քաղաքի համար: Այն ամայի տարածություն էր և ծառերի կարիք կար»,-փաստեց նա:

«Հայաստանի ծառատունկ ծրագրի» ներկայացուցչի տեղեկացմամբ, անտառում կտնկվեն Հայաստանի բնաշխարհին տիպիկ ծառեր, որպեսզի վնաս չպատճառվի էկոհամակարգին: «Անտառում տնկվեու են միայն տեղական' ինչպես դեկորատիվ, այնպես էլ վայրի պտղատու ծառեր, որոնք տիպիկ են հայկական բնաշխարհին»,-ասաց Արմինե Թոխմախյանը:

Նա ուրախությամբ փաստեց, որ ծառատունկի շնորհիվ Ստեփանավանի մոտակա շրջանների 100 բնակիչ կներգրավվի աշխատանքներում և կունենա ժամանակավոր աշխատանք: «Չնայած փետրվարից մեզ դիմել են նաև բազմաթիվ կամավորներ, ովքեր ցանկություն ունեն իրենց ներդրումն ունենալ հիշատակի անտառի ստեղծման գործում, մենք նաև ժամանակավոր աշխատանքով կապահովենք տեղի բնակչությանը, ովքեր կմասնակցեն ծառատունկին»,-հավելեց զրուցակիցը: Նրա խոսքով, անտառի ստեղծումից հետո կազմակերպությունը պետք է սեփական միջոցներով հոգ տանի ծառերի խնամքի մասին:

«Հայաստանի ծառատունկ ծրագիրը» իրակացնում է ծառատունկ ինչպես Հայաստանի մի շարք շրջաններում, այնպես էլ Արցախում: Մարտի 3-ին մեկնարակած ծառատունկով Արցախի սիրիահայերին տրամադրվել է 160 դեղձենի և նշենի: Առաջիկա օրերին ևս սպասվում է ծառատունկ Երևանին մոտ 2-3 շրջաններում:

Ստեղծվել է «Սոսէ և Ալեն» հիշատակի հիմնադրամը, որը «Հայաստանի ծառատունկ ծրագրի» (ATP) հետ սկիզբ է դրել մի նախագծի, որի նպատակն է ստեղծել անտառ-հուշահամալիր` ի պատիվ Սոսե Թովմասյանի և Ալեն Եկիկյանի: Նախատեսվում էր ֆեյսբուքյան էջում հավանողների քանակը հասցնել 10 հազարի և տնկել 50 հազար ծառ, ինչը նշված ժամկետներում ստացվել է:

Քարոզարշավը մեկնարկել է սեպտեմբերի 10-ին՝ Սոսէի ծննդյան օրը, և ավարտվել 2014-ի մարտի 10-ին՝ Ալենի ծննդյան օրը: