Փոքր քայլերի հաջողությամբ

Արդեն տևական ժամանակ է, ինչ ոչ իշխանական ուժերը` ՀԱԿ-ը, ՀՅԴ-ն, «Ժառանգությունը» և ԲՀԿ-ն Ազգային ժողովում հանդես են գալիս միասնական. գազի հարցով հանձնաժողով ստեղծելու հարցում, պարտադիր կուտակային կենսաթոշակի օրենքի հարցում, ինչպես նաև մարտի մեկի ժամանակավոր հանձնաժողով ստեղծելու մասին հարցը, որի հեղինակը ՀԱԿ խմբակցությունն էր, սակայն այն ԱԺ օրակարգ ընդգրկվեց չորս խմբակցությունների 44 ստորագրությունների արդյունքում:

Պարտադիր կուտակային կենսաթոշակի մասին օրենքի դեմ պայքարը տեղափոխվեց նաև փողոց: Օրենքն այսօր կարճվել է և Սահմանադրական դատարանում է, ինչի վերաբերյալ վերջնական որոշումը կհրապարակվի մարտի 28-ին:

Այս պահին գնում են քննարկումներ` չորս ուժերի կողմից կառավարությանն անվստահություն հայտնելու հարցը:

«Կարո՞ղ է ոչ իշխանական չորս ուժերի համախմբումը Հայաստանում հանգեցնել իշխանափոխության». այս հարցի վերաբերյալ կարծիքները բավականին տարբեր են: Շատերի կարծիքով` այն չի լինի, քանի որ չորս ուժերի մեջ կան ներկայացուցիչներ, ովքեր ժամանակին իրենք են եղել իշխանության կողքին:

Նույն հարցը Լուրեր.com-ն ուղղեց նաև «Բարգավաճ Հայաստան» խորհրդարանական խմբակցության քարտուղար Նաիրա Զոհրաբյանին, ով, սակայն, չցանկացավ բացել փակագծերը:

«Մենք գնում ենք փոքր քայլերի հաջողությամբ: Ես այս պահին չեմ ցանկանում փակագծերը բացել, բայց, այո′, երկրում անհրաժեշտ են լրջագույն համակարգային փոփոխություններ»,-ասաց Զոհրաբյանը: