Վարչապետը կրթաթոշակներ հանձնեց բարձր առաջադիմություն ցուցաբերած ուսանողներին

Հայաստանի երիտասարդական հիմնադրամի կողմից պետական բուհերի 780 ուսանող ստացան ուսման վարձի փոխհատուցում: Կրթաթոշակների հանձնման արարողությունը տեղի ունեցավ Երևանի պետական բժշկական համալսարանում, որին ներկա էին նաև ՀՀ վարչապետ Տիգրան Սարգսյանն ու ՀՀ կրթության և գիտության նախարար Արմեն Աշոտյանը:

Կառավարության ղեկավարը շնորհավորեց կրթաթոշակներ ստացած ուսանողներին և նշեց, որ իրենք ինչ էլ անեն ուսանողների համար, միևնույն է քիչ է:

«Դուք արժանի եք ավելիին: Կառավարության կարևորագույն խնդիրներից մեկն էլ կայանում է նրանում, որ դուք ձեզ երջանիկ զգաք մեր հայրենիքում և ձեր ապագան կապեք հայրենիքի հետ»,-ասաց վարչապետ Տիգրան Սարգսյանը՝ հավաստիացնելով, որ այս ծրագիրը լինելու է շարունակական, քանի որ այն նաև ուսանողության ինքնակազմակերպման լավ ձև է:

Տիգրան Սարգսյանի խոսքով` հենց ուսանողներն են սահմանում կրթաթոշակ ստանալու չափորոշիչները, ընտրում, թե ում պետք է հանձնվի կրթաթոշակ, վերահսկում, որպեսզի այդ գործընթացը լինի թափանցիկ:

Արմեն Աշոտյանի հավաստմամբ` հանրապետությունում չեն լինելու այնպիսի ուսանողներ, ովքեր սոցիալական ծանր պայմանների պատճառով դուրս են մնալու բուհերից: «Այսօր բուհերից դուրս մնացող ուսանողների 90 տոկոսի խնդիրը ցածր առաջադիմությունն է: Մենք ամեն ինչ անում ենք և անելու ենք, որպեսզի որևէ ուսանող, ով ունի բարձր առաջադիմություն և սոցիալական ծանր պայմաններ, որևէ դեպքում դուրս չմնա բուհից»,-ընդգծեց ՀՀ կրթության և գիտության նախարար Արմեն Աշոտյանը:

Երիտասարդական հիմնադրամի նախագահ Կարեն Ավագյանի տեղեկացմամբ` հիմնադրամի կողմից վերջին տարիների ընթացքում կրթաթոշակ է ստացել շուրջ 3000 ուսանող: Ավագյանն այդ ուսանողների անունից շնորհակալություն հայտնեց վարչապետին՝ ծրագրին աջակցելու և այն շարունակական դարձնելու համար:

«Այս տարի դիմածների մեջ բավականին շատ են սոցիալապես անապահով ընտանիքների ուսանողները: Հաշվի առնելով այս հանգամանքը, ինչպես նաև մրցույթին դիմած ուսանողների թիվը, հիմնադրամը, բացի ՀՀ կառավարության կողմից հատկացված 60 մլն դրամից, իր միջոցներից ևս գումարներ է հատկացրել ուսանողների ուսման վարձը փոխհատուցելու նպատակով»,-ասաց հիմնադրամի ղեկավարը:

Կրթաթոշակի մրցույթը հայտարարվել է պետական բուհերի առկա ուսուցման բակալավրիատում սովորող 1-ին կուրսի անվճար համակարգում չընդգրկված ուսանողների համար: Մրցույթի անցկացման համար ՀՀ կառավարությունը Երիտասարդական հիմնադրամին է հատկացրել 60 մլն դրամ:

Այս տարի, ընդհանուր առմամբ, մրցույթին մասնակցելու հայտ է ներկայացրել մոտ 1500 ուսանող:

Դիմել են Հայաստանի գրեթե բոլոր պետական բուհերից, այդ թվում մարզերում գործող և միջպետական բարձրագույն ուսումնական հաստատություններից:

Ուսանողների ընտրությունը կատարելիս հաշվի են առնվել սահմանված հստակ չափորոշիչները, մասնավորապես, ուսանողի առաջադիմությունը, սոցիալապես անապահով լինելու հանգամանքը, հասարակական ակտիվությունը և այլն:

Մրցույթում հաղթած ուսանողների անունները հրապարակվում են Հայաստանի երիտասարդական հիմնադրամի պաշտոնական կայքում՝ գործընթացի թափանցիկությունն ապահովելու համար: Հավաստագրերի հանձնման արարողությանը հրավիրվել են նաև ՀՀ Ազգային ժողովի բոլոր խմբակցությունների ներկայացուցիչները: