Ա′յ պետություն, է՞ս ա գովազդի քաղաքականությունը. Արամ Մանուկյան

Մեզ համար գովազդը շուկայական տնտեսության անհրաժեշտ բաղադրիչներից է, ազատ շուկայական տնտեսության կարևոր բաղադրիչը, բայց այն ուղղակի հակացուցված է մենաշհոնորհների հետ և եթե կան ոլորտում աղաղակող թերություններ, ապա դա հետևանք է մոնոպոլիայի, որի պատճառով էլ չկա մրցակցություն: Այս մասին այսօր Ազգային ժողովում ասաց ՀԱԿ խմբակցության քարտուղար Արամ Մանուկյանը` «Գովազդի մասին» օրենքում փոփոխություններ և լրացումներ կատարելու և «Հեռուստատեսության և ռադիոյի մասին» ՀՀ օրենքում փոփոխություններ և լրացումներ կատարելու մասին նախագծերի քննարկման ժամանակ:

Արամ Մանուկյանն առաջարկում է հետաձգել նախագծերը՝ նշելով, որ օրենքն ըդնունելու որևէ հիմնավոր փաստ չի տեսնում: 

Արամ Մանուկյանը խոսեց հայկական հեռուսատեսությամբ եթեր հեռարձակվող գովազդի մի քանի թերությունների մասին՝ նշելով, որ դրանցից ամենաաղաղակողը գովազդի չափազանց բարձր ձայնն է:

«Գովազդի ձայնը հակացուցված է առողջապահական առումով: Երբ դու տասը դեցիբալի վրա նայում ես հաղորդում, հետո գովազդը դառնում է քսան դեցիբալ, դա սթրես է առաջացնում, քնած մարդն է արթնանում, բայց որքան ուզում ես` ասա, չեն հասկանում, չեն ուզում այս դեֆեկտն ուղղել: Մեր գովազդներից շատերը հակացուցված են երեխային ցույց տալու համար: Հակացուցված է, որ նույն գովազդը հինգ անգամ ցույց են տալիս, սա արդեն հակագովազդ է»,-ասաց նա:

ՀԱԿ պատգամավորը խոսեց նաև գովազդային լեզվի թերությունների մասին: Պատգամավորի կարծիքով` դրանք անգրագիտության դրսևորում են:

«Ասում են՝ «կանացի վարսավիրանոց», «տղամարդու կաշվից կոշիկ», էս կարգի բաները լեցուն են, փող ես ծախսում սրանց համար, մեծ գումար, որ տղամարդու կաշվից կոշիկ գովազդեն: Սա անգրագիտություն է»,- հավելեց նա:

Արամ Մանուկյանի դիտարկմամբ` վերջին մեկ տարվա ընթացքում, հեռուսատեսությամբ գովազդվում է նաև արտագաղթը, այն ավտոբուսները, միկրոավտոբուսները, որոնցով կարելի է հարմարավետ հասնել ՌԴ ցանկացած քաղաք, մատչելի գներով.

«Այսինքն` մենք գովազդ ենք տալիս, որտեղ գովազդվում է տեղահանումը: Ա′յ պետություն, է՞ս ա գովազդի քաղականությունը, գովազդն էնքան լավ բան է՝ զգացմունք, էսթետիկա պետք է տա, բայց մեզ մոտ հակագովազդ է»,-ասաց Արամ Մանուկյանը: