Հոգևոր սպասավորը պահք պահողների համար մեկնում է «Անառակի կիրակիի» խորհուրդը

Հայ առաքելական եկեղեցու սպասավորները հասարակության շրջանում ակտիվացնում են իրազեկման աշխատանքները' պահք պահողներին ներկայացնելով պահքի շրջանում յուրաքանչյուր կիրակի օրվա խորհուրդը: Ամեն տարի պահքի երրորդ կիրակին համարվում է «Անառակի կիրակի», և այս տարի այն նշվելու է մարտի 16-ին: Մարտի 12-ին հրավիրված մամուլի ասուլիսի ժամանակ Արարատյան Հայրապետական թեմի առաջնորդարանի Սբ Սարգիս եկեղեցու արարողապետ Տեր Կարապետ քահանա Կարապետյանը նշեց, որ «Անառակի կիրակիի» խորհուրդն ապաշխարելու նոր հնարավորության ընձեռումն է: «Եթե Աստված մեզ հնարավորություն է տալիս զղջալու, պետք է օգտվել այդ հնարավորությունից»,- ասաց Տեր Կարապետ քահանա Կարապետյանը:

Ապաշխարող մարդու համար երկնքի դռները երբեք փակ չեն: «Մարդը հանցավոր ու մեղանչական է, բայց երբ նա գիտակցում է իր մեղքը ու զղջում է, անպայման Աստված ներում է նրան: Երբ մենք անդրադառնում ենք մեր ներաշխարհին, մեր հոգևոր ու անձնական կյանքին, տեսնում ենք, որ կան բազում մեղքեր, որոնք ենթակա են ապաշխարության»,-ասաց հոգևորականը:

Եկող կիրակին ևս մեկ անգամ մարդկանց հնարավորություն է տալիս մտածելու իրենց մեղքերի մասին և զղջալու: Եթե մարդկանցից մեկն ապաշխարում է, պետք է բոլորն ուրախանան:

Տեր Կարապես քահանա Կարապետյանը պարզաբանեց, թե ինչու է եկող կիրակին կոչվում «Անառակի կիրակի»' մեջբերելով մեկ հատված Աստվածաշնչից: «Հիսուսը մի առակ էր պատմում կորած կամ անառակ որդու մասին: Մի մարդ ուներ երկու զավակ, որոնցից կրտսերը պահանջում է իր հասանելիք ժառանգությունը: Երբ գնում է մեկ այլ երկիր, սկսում է վարել ցոփ ու շվայտ կյանք և վատնում է հոր ժառանգությունը: Վախը սրտում նա վերադառնում է տուն: Հայրը ընդառաջ է գնում որդուն և տեսնելով նրա զղջումը' ներում է նրան: Ավագ որդին տեսնում է սա և սրտնեղում է»: Այս առակում կրտսեր որդին խորհրդանշում է հեթանոս աշխարհը, իսկ ավագը' հրեա: