Հայտնի ջութակահար Դմիտրի Սիտկովեցկին հանդես կգա երիտասարդական նվագախմբի հետ

Ջութակահար Դմիտրի Սիտկովեցկին առաջին անգամ հանդես կգա Հայաստանում: Երաժիշտը Հայաստանի պետական երիտասարդական նվագախմբի հետ մարտի 13-ին ելույթ կունենա Ալ. Սպենդիարյանի անվան օպերայի և բալետի ազգային ակադեմիական թատրոնում: Հայ ունկնդրին կներկայացվեն Յոհաննես Բրամսի «Ջութակի կոնցերտ» և Լյուդվիգ վան Բեթհովենի սիմֆոնիա թիվ 6 «Հովվերգական» ստեղծագործությունները:

«Մենք մեր համատեղ համերգը վաղուց էինք պլանավորել: Ուրախ եմ, որ հաջողվեց այն իրականացնել: Մաեստրո Սիտկովեցկու մասին խոսելիս շատ բան կարելի է ասել: Ցավոք, նա առաջին անգամ է Հայաստանում: Մենք կշտկենք այդ սխալը: Նվագախմբի համար շատ կարևոր է աշխատել նման վարպետների հետ, քանի որ դա շատ է օգնում մեզ: Նվագախումբն առաջին անգամ է կատարելու Բրամսի Կոնցերտը: Սիտկովեցկու հետ դեռ փորձ չենք արել, և նա դեռ չի կարող կիսել իր տպավորությունները»,- «Արմենպրես»-ի փոխանցմամբ, նշեց ՀՊԵՆ գեղարվեստական ղեկավար և գլխավոր դիրիժոր Սերգեյ Սմբատյանը:

Հայտնի ջութակահար Դմիտրի Սիտկովեցկին ընդգծեց, որ շատ ուրախ է առաջին անգամ ելույթ ունենալ Հայաստանում: «Ես երկար տարիներ համերգային գործունեություն եմ ծավալում` արդեն 50 տարուց ավելի: Ուրախ եմ, որ առաջին այցս Հայաստան կնշանավորվի հենց երիտասարդական նվագախմբի հետ համատեղ ելույթով: Հայաստանում միշտ էլ լավ երաժիշտներ են եղել, ես շատ հայերի հետ եմ սովորել Մոսկվայում, ինչպես նաև Ջուլիարդի դպրոցում: Երիտասարդությունը մեր ապագան է: Երիտասարդական նվագախմբերի առկայությունը շատ կարևոր է»,-նշեց ջութակահարը: Երաժիշտը հավելեց, որ շատ է սիրում իր նվագախմբում ընդգրկել հատկապես երիտասարդ տաղանդավոր երաժիշտներին: Սիտկովեցկին 2003 թվականից մինչ օրս Գրինսբորոյի սիմֆոնիկ նվագախմբի երաժշտական տնօրենն է:

Դմիտրի Սիտկովեցկին ծնվել է Ադրբեջանում, երաժշտական կրթություն է ստացել Մոսկվայի կոնսերվատորիայում և Նյու Յորքի Ջուլիարդ դպրոցում: 1987-ից կնոջ և դստեր հետ ապրում է Լոնդոնում: Նա հանդես է եկել բազմաթիվ աշխարհահռչակ նվագախմբերի հետ, այդ թվում՝ Բեռլինի, Նյու Յորքի, Լոս Անջելեսի ֆիլհարմոնիկ, Թագավորական նվագախմբի և այլն: Երաժիշտը մշտապես մասնակցում է ճանաչված միջազգային փառատոններին: