ՊԵԿ բարեփոխումների արդյունքում ավտոմաքսազերծումը կտևի առավելագույնը 30 րոպե

Հայաստան 13 Մարտ, 2014 2:51

Հայաստանում ավոտմաքսազերծման գործընթացն այսօր իրականացվում է 30 րոպեում, իսկ մաքսային ձևակերպումներից մինչև հաշվառում` 1 ժամում: Այս մասին ավտոմաքսատանը լրագրողների հետ հանդիպմանը նշել է ՊԵԿ ավտոտրանսպորտային միջոցների մաքսային ձևակերպումների մասնագիտացված մաքսատան պետ Բաբկեն Ղազարյանը' ներկայացնելով միջազգային չափանիշներով վերանորոգված սպասարկման սրահը, որը նպաստում է առավել թափանցիկ աշխատաոճին:

Բաբկեն Ղազարյանի հավելմամբ` ատոմաքսազերծման ընթացակարգերի քանակը կրճատվել է կրկնակի անգամ, իսկ հերթականությունը դարձել է առավել համակարգված և տրամաբանական: «Եթե նախկինում հայտարարատուները մեկ պատուհանին մոտենում էին 2-3 անգամ, ապա այսօր' 1 անգամ, ինչի արդյունքում այցելուի' մաքսատանը գտնվելու ժամանակահատվածը կրճատվել է առնվազն 15 րոպեով»: Այցելուներին միջազգային չափանիշներին համապատասխանող ծառայություն մատուցելու և սպասարկման բարձր որակ ապահովելու նպատակով լիովին բարեփոխվել է մաքսատան շենքը, ներդրվել են նաև ժամանակի նոր չափ անիշներին համապատասխանող տեխնիկական միջոցներ:

Սպասարկման որակի բարելավման ու ընթացակարգերի պարզեցման արդյունքում ավտոմաքսատունն այժմ պատրաստ է առանց հերթերի օրական սպասարկել 500 հայտարարատուի: Սպասարկող անձնակազմի` այցելուների հանդեպ վերաբերմունքի և վարքագծի հարցը ևս մշտապես ավտոմաքսատան պետ Բաբկեն Ղազարյանի դիտակետում է: «Բարեփոխումների հիմքում դնելով այցելուի հարմարավետությունը' ավտոմաքսատան նոր սպասարկման սրահում այսուհետ մշտապես ներկա է աշխատակից, ով կուղղորդի այցելուներին իրենց անհրաժեշտ ընթացակարգերի կատարման գործընթացում»,-տեղեկացրել է ավտոմաքսատան պետը: