«Տո խելո′ք, Երկրապահը հայ մարդն է, Երկրապահը այն 3 000 պատանիներն են, որ մարտի 5-ին Սպարապետի առաջ երդվեցին»

Լուրեր.com-ի խմբագրություն ներկայացավ Արցախյան պատերազմի անվանի մասնակիցներից Հայրապետ Կարապետյանը (պատերազմի մասնակիցներին հայտնի է Սարիկ անվամբ) և խնդրեց իր խոսքը փոխանցել Սուրեն Աբրահամյանի' օրերս հայտնած այն կարծիքի վերաբերյալ, թե ԵԿՄ նորընտիր վարչությունը համեմատելի է ոչ թե Վազգեն Սարգսյանի ժամանակվա Երկրապահի հետ, այլ Հանրապետության խոշոր հարկատուների ցուցակի: Սարիկի խոսքը ստորև ներկայացնում ենք առանց խմբագրական միջնորդության:

-Սուրեն Ջհանգիրիչ է, Ջհանգիրով է, թե Ջհանգիր օղլու, թող Երկրապահի մասին չմտածի: Դա այն մարդկանցից է, որ Սպարապետ Վազգեն Սարգսյանի հացը կերել է, Սպարապետով մարդ է դարձել, այսօր ուրանում է Սպարապետին: ԵԿՄ նորընտիր վարչության կազմը համեմատում է Հանրապետության խոշոր հարկատուների ցանկի հետ: Տո խելո'ք: ԵԿՄ վարչության անդամը ես եմ: Ձեռքդ դիր խղճիդ ու ասա' ե՞ս եմ օլիգարխ, թե՞ դու: Ես ողջ պատերազմի ընթացքում եղել եմ ամենաթեժ կետերում, Զորավար Մանվել Գրիգորյանի հրամանատարությամբ մշտապես կանգնած եմ եղել առաջին գծում: Հիմա էլ ճոխության մեջ չեմ խեղդվում: Համարում եմ, որ քեզանից հարուստ լինելու, քեզանից լավ ապրելու իրավունք ունեի: Բայց արի իմ ու քո ինչքը համեմատենք, տեսնենք մեզանից ո՞վ կարող է տեղ գտնել խոշորագույն հարկատուների ցանկում: Իմ, իմ ընկերների, երկրապահների և քո տարբերությունն այն է, որ մենք գիշեր ու զօր անկեղծորեն մտածում ենք սահմանի բնակչի մասին, մտածում ենք զոհված, անհայտ կորած, հաշմանդամ և ԵԿՄ անդամ ազատամարտիկների ընտանիքների մասին, մտածում ենք երիտասարդ և պատանի սերունդների հայեցի դաստիարակման մասին:

Միայն թուրքը, չկամը, նենգը չի տեսնի, որ Զորավար Մանվել Գրիգորյանի ղեկավարած Երկրապահ կամավորականների միությունն այսօր մեր երկրում Սպարապետի գործին, ժառանգությանը հավատարիմ մնացած թիվ մեկ կառույցն է: Երկրապահն այսօր ապրում, արարում, շնչում է Վազգենով, առաջնորդվում է Վազգենի պատգամներով: Տո խելո′ք, Երկրապահը հայ մարդն է, Երկրապահը այն 3 000 պատանիներն են, որ մարտի 5-ին Սպարապետի առաջ երդվեցին: Իսկ դու մոռանում ես անգամ, որ Երկրապահի հավերժ նախագահը Սպարապետ Վազգեն Սարգսյանն է:

Իսկ Ջհանգիր օղլուն չի կարող երկրապահ լինել, չի կարող ԵԿՄ-ի հետ կապ ունենալ: Մենք թույլ չենք տա, որ այդպիսիններն իրենց ներկայությամբ պղծեն Երկրապահ կամավորականների միությունը: Եվ զգուշացնում ենք դրան ու այլ թրքատիպ երևույթներին' ձեռքներդ հեռու Երկրապահից, չփորձեք այլևս վայրահաչել մեր հասցեին: Հակառակ դեպքում պատասխանը կարող է արդար, բայց դաժան լինել: