Տիեզերքի ուսումնասիրության ոլորտում կստեղծվի հայ-ռուսական ուսումնական և վերապատրաստման կենտրոն

Ազգային անվտանգության խորհրդի քարտուղար Արթուր Բաղդասարյանի նախագահությամբ մարտի 12-ին տեղի է ունեցել Ռուսաստանի Դաշնության «Ռոսկոսմոս» տիեզերական գործակալության պատվիրակության և Հայաստանի Հանրապետության շահագրգիռ պետական մարմինների ներկայացուցիչների մասնակցությամբ աշխատանքային խորհրդակցություն: Ինչպես «Արմենպրես»-ին տեղեկացրին ՀՀ ԱԱԽ մամուլի ծառայությունից, աշխատանքային խումբը, որը նախօրեին այ ցելություններ է կատարել ՀՀ պետական մարմիններ, Բյուրականի աստղադիտարան, Աշտարակի ռադիոֆիզիկական գիտահետազոտական ինստիտուտ, հանդիպել ՀՀ ԳԱԱ գիտահետազոտական ինստիտուտների և մի շարք ձեռնարկությունների ղեկավարների հետ, ամփոփել է արդյունքները:

«Համագործակցության լուրջ ներուժ կա Հայաստանի Հանրապետության և աշխարհի խոշորագույն գործակալություններից մեկի' «Ռոսկոսմոս» դաշնային գործակալության միջև, որի հետ մեր համագործակցության արդյունքում արդեն իսկ վերազինվել է Բյուրականի աստղադիտարանը: Պայամանավորվածություն ձեռք բերվեց, որ ֆինանսական և տեխնիկական աջակցության աշխատանքները կշարունակվեն, ինչը հնարավորություն կտա առաջիկա մեկ-երկու տարվա ընթացքում Բյուրականը բերել այն տեսքի և այն հնարավորությունների, որը կարող է աշխարհում ունենալ լուրջ դերակատարում տիեզերքի ուսումնասիրության ոլորտում»,-նշել է ԱԱԽ քարտուղարը:

Արթուր Բաղդասարյանի խոսքով, ըստ պայմանավորվածության, տիեզերքի ուսումնասիրության ոլորտում կստեղծվի հայ-ռուսական ուսումնական և վերապատրաստման կենտրոն և արդեն իսկ թիրախավորվել են մի շարք հայկական ձեռնարկություններ, որոնց իրավունք կտրվի մասնակցել «Ռոսկոսմոս» գործակալության պետական պատվերների ձևավորման աշխատանքներին, այսինքն' հայկական ձեռնարկությունները կարող են արտադրանք թողարկել «Ռոսկոսմոսի» կարիքների համար:

Արթուր Բաղդասարյանն ընդգծել է, որ Ռուսաստանի Դաշնության և ՀՀ Ազգային անվտանգության խորհուրդների 2012-2013թթ. համագործակցության ծրագրի շրջանակներում Բյուրականի աստղադիտարանի համալիր արդիականացման ծրագիրը ապացուցել է իր արդյունավետությունը և այդ փորձը կարող է կիրառելի լինել նաև այլ ձեռնարկությունների պարագայում ևս:

Իր խոսքի վերջում ԱԱԽ քարտուղարը նշել է, որ պայմանավորվածությունները բազմաթիվ են և վստահություն է հայտնել, որ այս համագործակցությունը կտա լավ արդյունքներ: Խորհրդակցության մասնակիցները ևս միակարծիք են եղել, որ Հայաստանն ունի գիտական մեծ ներուժ, որը կարող է արդյունավետորեն օգտագործվել տիեզերական ուսումնասիրությունների, հայտնագործությունների և ճյուղային արտադրության զարգացման ոլորտում: Երկուստեք հեռանկարային են գնահատվել համագործակցության հնարավորությունները: «Ռոսկոսմոսի» ներկայացուցիչ ները պատրաստակամություն են հայտնել հայկական ձեռնարկությունների հետ ընդլայնել փոխգործակցության ուղղությունները:

Արթուր Բաղդասարյանի հրավերով առաջիկայում նախատեսվում է նաև «Ռոսկոսմոսի» ղեկավար Օլեգ Օստապենկոյի գլխավորած պատվիրակության այցը Հայաստան: