Հայաստանում դիաբետով հիվանդներին կապահովեն օրգանիզմում շաքարի մակարդակը ստուգող սարքերով

ՀՀ առողջապահության նախարարությունը ինսուլին ներմուծող ընկերություններից մեկի հետ պատրաստվում է հուշագիր ստորագրել, որով ընկերությունը ՀՀ-ում յուրաքանչյուր տարի ավելացող շաքարային դիաբետով հիվանդներին կտրամադրի օրգանիզմում շաքարի մակարդակը ստուգող սարքեր: Մարտի 12-ին Ազգային ժողով-կառավարություն հարց ու պատասխանի ժամանակ հայտնեց նախարար Դերենիկ Դումանյանը' պատասխանելով ՀՀԿ պատգամավոր Ռուզան Մուրադյանի հարցին: «Հարցին, թե մենք կկարողանանք ստուգիչ սարքերը և դրանց ստրիպները տրամադրել շաքարային դիաբետով հիվանդներին, պետք է ասեմ, որ քայլեր են արվում: Մենք այս կապակցությամբ հանդիպում ենք ունեցել ներմուծող ընկերություններից մեկի հետ, որի ներկայացուցիչները խոստացան, որ յուրաքանչյուր տարի նոր հայտնաբերված հիվանդներին կնվիրեն այդպիսի սարքեր ու համապատասխան ստրիպներ: Մենք ցանկանում ենք հուշագիր ստորագրել ու իրականություն դարձնել այդ խոստումը»,- ասաց Դերենիկ Դումանյանը: Յուրաքանչյուր տարի հանրապետությունում ավելանում է 1200 հիվանդ:

Նախարարը նշեց, որ Առողջապահության նախարարության անցյալ տարվա գնումների մեջ ինսուլինի գնման հետ կապված բավականին մեծ խնայողություններ են արվել' շնորհիվ նրա, որ նախկինում 12 դոլարին համարժեք դրամի փոխարեն արտադրողից ուղիղ գնում կատարելով ինսուլինը ձեռք է բերվել 3.30 դոլարին համարժեք դրամով: Կնքվել է հնգամյա պայմանագիր, ըստ որի, հինգ տարի շարունակ նույն գումարով է դեղորայք վաճառվելու Հայաստանին: Այդ տարիներին խնայվող գումարով ԱՆ պատրաստվում է ինսուլինակախյալ հիվանդներին 100 տոկոսով ապահովել դեղորայքով:

Ներկայումս հանրապետությունում ինսուլինակախյալ հիվանդների թիվը 12 հազար 800 է: Ստրիպը անհրաժեշտ է տեղադրել շաքարը չափող սարքի' գլյուկոմետրի մեջ, շաքարը պարբերաբար ստուգելու համար: