«Հրապարակ». Կարևորը Ծառուկյանի այն հայտարարությունն է, որ ԲՀԿ-ն չի կարող լինել դասական ընդդիմություն. Սամվել Նիկոյան

Գագիկ Ծառուկյանը շարունակում է քառյակի ուժերի հետ հանդիպումները: «Հրապարակ»-ի զրուցակիցն է ՀՀԿ-ական պատգամավոր, ԱԺ նախկին խոսնակ Սամվել Նիկոյանի հետ: 

- Պարոն Նիկոյան, ոչ իշխանական քառյակի պայքարը թեւակոխել է նոր փուլ, Գագիկ Ծառուկյանն իր մոտ է հրավիրում խմբակցություններին ու նրանց հետ համատեղ քննարկում երկիրը ծանր վիճակից դուրս բերելու օրակարգը: Չե՞ք կարծում, որ Ծառուկյանի հրավերներն արդեն լրջացնում են իշխանության տապալման ծրագիրը:

- Գիտեք ինչ, միշտ էլ ինչ-որ հարցերի շուրջ կարողանում են միավորվել, պայքարել, հետո բաժանվել: Սկզբից հիմնավորել՝ իրենք ինչ են ուզում, եւ ասել՝ դա է Հայաստանի փրկությունը, հետո հիմնավորել՝ ինչու չեղավ այդ փրկությունը, եւ ովքեր են մեղավորները: Այսպես եղել է անկախության բոլոր տարիներին, բացառություն չէ սա, սովորական քաղաքական գործընթաց է, եւ, ավելի շուտ՝ հասարակական տրամադրությունների վրա ազդելու խնդիր կա: Ես չեմ կարծում, որ այդ քաղաքական ուժերն այդքան միամիտ են եւ չգիտեն մեր Սահմանադրությունը, որտեղ գրված են այն ձեւերը, որով կարելի է հասնել կառավարության հրաժարականին, եւ իրենք շատ հստակ գիտեն, որ որեւէ արդյունավետ քայլ այդ ուղղությամբ իրենք ի վիճակի չեն ձեռնարկել, դա կլինի ընդամենը լրագրողների համար հետաքրքիր նյութերի շրջանակում եւ վերջ:

- Ձեզ համար սովորակա՞ն է, որ ընդդիմադիրների գործընթացներին միացել է նաեւ իշխանությունների հետ սերտաճած գործարարը, թե՞ նա անջատվել է իշխանությունից, որ նույն իշխանության դեմ պայքարի գործընթաց է փորձում գլխավորել:

- Գիտեք, որպեսզի գնահատական տանք, պետք է ուսումնասիրենք որոշ ժամանակահատված, որից հետո չորս քաղաքական ուժերի հնարավոր համագործակցության վերաբերյալ գնահատական տանք: Ինչու նո՞ր է նրանց համագործակցությունը, հիշեք՝ այս 4 տարիներին եղել են առիթներ, դեպքեր, որ հավաքվել են, ինչ-որ խնդիր են վերցրել ու տվյալ հարցում փորձել համագործակցել, այնուհետեւ իրար սկսել են մեղադրել, թե դա ինչու չեղավ: Հիմա ես ասում եմ՝ ով ինչ ասի, ինձ համար «Բարգավաճ Հայաստան» կուսակցության վարքագծի տեսակետը հիմնականում Գագիկ Ծառուկյանի այն հայտարարությունն է, որ ԲՀԿ-ն քաղաքագիտական առումով չի կարող լինել դասական ընդդիմություն: Սա է հիմնականը, եւ, իհարկե, մնացած հարցերի շուրջ իրենց տեսլականն ու մոտեցումներն ունեն եւ իրենց դիրքորոշումը փորձելու են պաշտպանել, բայց հիմնական շեշտադրումը հենց Ծառուկյանի ասածն է: Եթե դուք ուշադիր եք, մեկն ասում է՝ չէ, կառավարության հրաժարականն ենք պահանջում, իսկ եթե ավելի անկեղծ՝ վարչապետի հրաժարականը: Դե, սա նոր չի, չէ՞, տեւական ժամանակ է՝ մի ամբողջ հզոր քաղաքական գործունեություն ծավալվում է անձի դեմ: Թե ինչու է դա այդպես, ինձ համար լրիվ հասկանալի է, եւ այս մնացածը՝ երկիրը փրկենք եւ այլն, դրանք քաղաքական հանրային ընկալման մթնոլորտն ապահովելու համար են, որով փորձում են լուծել կոնկրետ խնդիրներ:

Շարունակությունը` «Հրապարակ»-ի այսօրվա համարում: