Վանում խոտի պահեստի վերածված հայկական եկեղեցին կվերանորոգվի

Վանում խոտի պահեստի վերածված հերթական հայկական եկեղեցին թուրքական իշխանությունները պաշտպանության տակ կառնեն: Ինչպես հաղորդում է թուրքական haber3.com-ը, այս մասին հայտարարել է Վանի մշակույթի և զբոսաշրջության վարչությունը:

Այն բանցի հետո, ինչ տարածվեցին տեղեկություններ առ այն, որ Վանի նահանգի Չաթաքի շրջանի Քորլու գյուղի Ալբուջաք կոչվող վայրում գտնվող երբեմնի հայկական եեղեցին վերածվել է հարդանոցի, վարչության տնօրեն Մուզաֆֆեր Աքթուղը այնտեղ է ուղարկել Վանի մշակութային կոթողների պաշտպանության շրջանային վարչությունից չորս հոգուց բաղկացած անձնակազմի: Վերջինիս անդամները տեղում կատարած ուսումնասիրությունից հետո հատուկ զեկույց են պատրաստել: Զեկույցի հիման վրա Աքթուղը հայտնել է, որ եկեղեցու տարածքը կմաքրվի և կանցնի իրենց պաշտպանության ներքո: Նա հայտնել է, որ պատմական հուշարձանի վերականգնման համար իրենք անգամ գրություն կարող են ուղարկել Թուրքիայի մշակույթի և զբոսաշրջության նախարարություն: «Մենք այս պատմական եկեղեցին զբոսաշրջային վայր կդարձնենք»,- ասել է նա:

Հայկական եկեղեցու' խոտի պահեստի վերածվելու մասին տեղեկությունների տարածվելուց հետո հայտնի էր դարձել, որ եկեղեցին 30 տարի առաջ 5 տարի ծառայել է որպես դպրոց: Անտերության և անտարբերության մատնվելու պատճառով գյուղացիները եկեղեցին օգտագործում են խոտ ամբարելու համար: Տարիների ընթացքում որպես խոտի, փայտի, աթարի պահեստ օգտագործված եկեղեցին ավերակ է դարձել: Նրա մի հատվածն արդեն փլուզվել է: Եկեղեցին հայտնվել է ոչնչացման եզրին: