ԱԺ փոխնախագահը պատասխանել է Վլադիմիր Ժիրինովսկու հայտարարությանը

Հայաստանի դիրքորոշումը Լեռնային Ղարաբաղի ապագայի վերաբերյալ հստակ է' Արցախի ժողովուրդը 1991 թվականին կողմ է քվեարկել անկախությանը՝ փաստացի ճանաչելով Արցախի Հանրապետությունը, և Հայաստանը կանի ամեն ինչ՝ հասնելու Արցախի Հանրապետության միջազգային ճանաչմանը։ Այս մասին մարտի 13-ին ՀՀԿ Գործադիր մարմնի նիստի ավարտից հետո լրագրողների հետ ճեպազրույցում նշեց ՀՀ Ազգային Ժողովի փոխնախագահ, ՀՀԿ մամուլի խոսնակ Էդուարդ Շարմազանովը՝ խոսելով Ռուսաստանի Լիբերալ-դեմոկրատական կուսակցության առաջնորդ Վլադիմիր Ժիրինովսկու այն հայտարարության մասին, որ Արցախը պետք է մտնի ՌԴ կազմի մեջ։ «Ես տեղյակ եմ պարոն Ժիրինովսկու հայտարարությանը։ Մենք էլ մեր կողմից ներկայացնում ենք Հայաստանի Հանրպապետության դիրքորոշումը։ Մեր կարծիքը մնում է անփոփոխ՝ Արցախի ժողովուրդը 1991 թվականի դեկտեմբերի 10-ին հանրաքվեով որոշել է Արցախի ճակատագիրը։ Հանրաքվեի ժամանակ բնակչության ճնշող մեծամասնությունը կողմ է քվեարկել Արցախի Հանրապետության անկախությանը, և այսօր Արցախը փաստացի պետությո ւն է։ Մենք պետք է ամեն ինչ անենք' հասնելու Արցախի Հանրապետության միջազգային ճանաչմանը»,-ասաց Շարմազանովը։ Նրա խոսքով՝ Ռուսաստանը ԱՄՆ-ի և Ֆրանսիայի հետ Մինսկի խմբի համանախագահ երկիր է, և Ռուսաստանի պաշտոնական դիրքորոշումը բազմիցս արտահայտել է ՌԴ նախագահը երկու գործընկեր համանախագահ երկրների նախագահների հետ արված հայտարարության մեջ։ «Այնտեղ հստակ նշվում էր, որ իրենք՝ համանախագահ երկրները, գտնում են, որ խնդիրը պետք է լուծվի երեք հիմնա րար սկզբունքների հիման վրա՝ պահպանելով ինքնորոշման իրավունքն ու ուժի չկիրառումը»,-ասաց Շարմազանովը։

Ռուսաստանի Լիբերալ-դեմոկրատական կուսակցության առաջնորդ Վլադիմիր Ժիրինովսկին ավելի վաղ հայտարարել էր, որ Հայաստանը և Ադրբեջանը երբեք համաձայնության չեն գա Ղարաբաղի հարցում։ «Այդ իսկ պատճառով էլ ամենալավ տարբերակը կլինի այն ևս Ռուսաստանի կազմի մեջ մտցնելը: Այդ ժամանակ հայերն էլ չեն նեղանա, իսկ ադրբեջանցիները ստիպված կլինեն հաշտվել, քանի որ այն չի մնում Հայաստանին, այլ մտնում է ՌԴ կազմի մեջ»,- ասել էր Ժիրինովսկին: