«Հրապարակ». Ինչ ասում եմ Մոսկվայում, ասում եմ նաև Վաշինգտոնում. ես առաջնորդվում եմ ազգային շահով. Րաֆֆի Հովհաննիսյան

Այսօր Իջեւանում Րաֆֆի Հովհաննիսյանը լրագրողների հետ զրույցում մանրամասնեց իր եւ ԲՀԿ առաջնորդ Գագիկ Ծառուկյանի հետ զրույցը: Նրա խոսքերով՝ կարեւոր չէ, թե ում նախաձեռնությամբ է եղել հանդիպումը, որովհետեւ դա սովետական մտածողություն է. «Կարեւոր չէ, թե ով է նախաձեռնել: Մամուլի հաղորդագրությունները մեկ-մեկ ճիշտ չեն ներկայացնում իրականությունը: Եղել է մոտ մեկուկես ժամ, ոչ թե երեք:Ես քննարկեցի, որ նոր վիճակի մեջ է Հայաստանի Հանրապետությունը, ով ուզում է ինքնամաքրվել, ով ուզում է ենթարկվել օրենքին, ով ուզում է սեփական հետագիծը վերանայել, այս բոլորը բոյկոտեցին ընտրությունները:

Իրենք չհավատացին ժողովրդին: Ես հավատացի: Դրա համար այս բոլոր մարդկանց ես ասացի, որ դուք եւս ունեք ներդրում, եթե ուզում եք: Բայց պիտի վերանայեք ձեր հետագիծը եւ պիտի որոշեք՝ կեղծվա՞ծ են այս ընտրությունները, թե՞ չէ: Ժողովրդի հաղթանակը պիտի ճանաչե՞ք, թե՞ չէ: Երկխոսությունը պատկանում է բոլորին: Ես ոչ մեկի հավատաքննիչը չեմ, բայց եղավ շատ շիտակ հանդիպում: Իմ մասնավոր եւ հանրային օրակարգերը չեն տարբերվում: Ինչ ասում եմ հրապարակավ, ասում եմ նաեւ մասնավոր հանդիպումների ժամանակ:

Ինչ ասում եմ Մոսկվայում, ասում եմ նաեւ Վաշինգտոնում, որովհետեւ ես առաջնորդվում եմ ազգային շահով, ժողովրդի Սահմանադրական իրավունքով: Ես այդ հանդիպման ժամանակ ասացի, որ ով պատրաստ է ընդունել ժողովրդի հաղթանակը, վերանայել սեփական հետագիծը, ինքը տեղ ունի այս ընդհանուր շարժման մեջ: Որոշումը ձերն է»: Հարցին՝ հնարավոր համարո՞ւմ եք, որ պարոն Ծառուկյանը կանգնի ձեր կողքին՝ Րաֆֆի Հովհաննիսյանը պատասխանեց. «Դա իրեն պիտի հարցնեք: Ոչ մեկը թող հարթակին չկանգնի: Բայց եթե իրենք ասում են, որ ժողովրդի կողքին են, տեսնենք:

Հիմա ժամանակը եկել է»: Մենք խնդրեցինք, որ պարոն Հովհաննիսյանը պատմի, թե հանդիպման ընթացքում ինչ խոստում է առհասարակ տվել Գագիկ Ծառուկյանը, սակայն նա չմանրամասնեց՝ ասելով, որ Գագիկ Ծառուկյանին հարցնենք:

Շարունակությունը` «Հրապարակ»-ի այսօրվա համարում: