Հնագետները Դվինի պեղավայրում ամրակայման աշխատանքներ կիրականացնեն

Դվինի հնավայրում պեղումներ, բարեկարգման և ամրակայման աշխատանքներ կիրականացվեն: «Արմենպրես»-ի հետ զրույցում այս մասին ասաց ՀՀ ԳԱԱ Հնագիտության և ազգագրության ինստիտուտի տնօրեն Պավել Ավետիսյանը: Կառավարությունն աշխատանքներն իրականացնելու համար 10 մլն դրամ կհատկացնի: «Մենք առայժմ ներկայացրել ենք ծրագիրը, ֆինանսավորումից հետո Մշակույթի նախարարության հետ կմշակենք, թե կոնկրետ ինչ տարածքներ ենք բարեկարգելու: Բազմաթիվ նախնական աշխատանքների կարիք կա»,-ասաց Ավետիսյանը:

2013 թվականին Դվինում իրականացված պեղումները բավական լավ արդյունքներ են տվել: «2013 թվականին այնտեղ հնագետները բացել են Շեդադյանների շրջանի բավական հետաքրքիր մոնումենտալ կառույց: «Առայժմ կառույցի գործառնական նշանակությունը չենք որոշել, քանի որ դեռ աշխատանքներ պետք է տարվեն: Այս տարի պեղումների հետ զուգահեռ կշարունակենք նաև այդ աշխատանքները»,-ասաց Ավետիսյանը` հավելելով, որ Հնագիտության և ազգագրության ինստիտուտը պատրաստում է նախորդ տարի կատարած աշխատանքների հաշվետվությունը, որն առաջիկայում կներկայացվի ՀՀ մշակույթի նախարարություն:

Դվինի հնավայրում առաջին անգամ պեղումներ է իրականացրել 1850 թվականին Կովկասի փոխարքայի դիվանատան պաշտոնյա Տոկարևը: 1899 թ. Դվինի տարածքն ուսումնասիրել է Նիկողայոս Մառը: Դվինում պեղումներ է կատարել նաև հնագետ Խաչիկ Դադյանը: Խորհրդային տարիներին Դվինի հնավայրը պեղել են հայ գիտնականները: Դվինի պեղումները ցույց են տալիս, որ Դվինի տարածքը բնակեցված է եղել դեռ հազարամյակներ առաջ: Այստեղ հայտնաբերվել են նախաքրիստոնեական տաճարների մնացորդներ, բազում հնագիտական գտածոներ: ՀՀ կառավարությունը մարտի 6-ի նիստում հավանություն է տվել մի շարք ծրագրերի, այդ թվում' Դվինի հնավայրի պեղումների և պեղավայրի ամրակցման աշխատանքների իրականացմանը: