Պետք է կարողանան նաև զիջումների գնալ

Առայժմ ես աղոտ եմ պատկերացնում, որ դա կարող է տեղի ունենալ, որովհետև, ըստ էության, տարբեր գաղափարական ուղղվածությունների տեր քաղաքական ուժեր են: Այս մասին Լուրեր.com-ի հետ զրույցում ասաց «Ժառանգություն» խմբակցության ղեկավար Ռուբեն Հակոբյանը` անդրադառնալով իշխանության կողմից հնչած այն տեսակետին, որ «Ժառանգությունը», ՀԱԿ-ը և ՀՅԴ-ն միավորվեն ԲՀԿ-ի շուրջ և մեկ բևեռ ձևավորվելով` ստանան ամերիկյան մոդել՝ մեկ իշխանություն և մեկ ընդդիմություն։

«Եթե ընդհանրապես խոսենք քաղաքական մշակույթի և զարգացումների մասին, իհարկե ինչ-որ տեղ քաղաքական մշակույթը պետք է հանգեցնի նրան, որ 75-80 կուսակցություն չլինեն, այլ իսկապես կարողանան մեծ, կայացած, հստակ քաղաքական գաղափարական ուղղվածությամբ մի քանի կուսակցություններ լինեն, որն անպայման ավելի անհրաժեշտ, ձեռնտու է պետության համար, բայց ասել, որ սա կարող է մոդել դառնալ, ես հիմա աղոտ եմ պատկերացնում»,-ասաց Հակոբյանը:

Հարցին, թե իշխանափոխության հարցում ԲՀԿ-ն այլ տեսակետ ունի և ամբողջական իշխանափոխության կողմնակից չէ, դուք ինչպիսի՞ հարց կդնեք ԲՀԿ-ի առաջ, Ռուբեն Հակոբյանը պատասխանեց. «Չորս քաղաքական ուժեր են այսօր համագործակցում, և շատ բնական է, որ դիրքորոշումների որոշակի զիջումների պետք է գնան: Այլապես, եթե յուրաքանչյուրը միայն պնդի իր մոտեցումը, այդ համագործակցությունը չի կարող կալայնալ: Եվ հիմա տակտիկական հարցերով կարող ենք ինչ-որ համաձայանությունների գալ, սա շատ օրինաչափ, քաղաքագիտական գործընթաց է, որ եթե ուժերն ուզում են համագործակցել, պետք է կարողանան նաև զիջումների գնալ»: