Ընդդիմությունն այլընտրա՞նք է դառնում, թե՞ այլընտրանքն է ընդդիմություն դառնում. Գալուստ Սահակյան

Ազգային ժողովի ՀՀԿ խմբակցության ղեկավար Գալուստ Սահակյանը կարևորում է ոչ իշխանական չորս ուժերի համախմբումը' նշելով, որ քաղաքական մեծամասնության հիմնական սկզբունքն է ապահովել քաղաքական դաշտում մեծ թվով կուսակցությունների մասնակցությունը:

«Մենք կողմնակից ենք, որպեսզի քաղաքական դաշտում մարդիկ կարողանան միասնական հանդես գալ, ինչպես դա փորձում են անել ոչ իշխանական չորս ուժերը: Մեր սկզբունքը հենց այդ է եղել' անել ամեն ինչ, որ քաղաքական շատ ուժեր մասնակցեն քաղաքական գործընթացներին' լինեն ընդդիմադիր, թե իշխանական դաշտում: Երկրին պետք է ընդդիմություն, որին ձևավորման համար պետք է ճանապարհ տալ»,- ԱԺ ճեպազրույցների ժամանակ հայտնեց պատգամավորը:

Գալուստ Սահակյանի խոսքով` տարբեր գործիչների կողմից համակարգային փոփոխությունների հարցի բարձրացումը բնականորեն բերելու է հասարակության այն հարցադրմանը, թե ժամանակին իշխանության զգալի մաս լինելով' ինչու դա չեն արել: «Բացի դրանից, ոչ իշխանական չորս ուժերի միավորման դեպքում, հարց կառաջանա' ընդդիմությունն այլընտրա՞նք է դառնում, թե՞ այլընտրանքն է ընդդիմություն դառնում: Այս հարցի պատասխանը լինելուց հետո նոր խաղի կանոնները կհստակեցվեն»,-ասաց ՀՀԿ-ական պատգամավորը:

Գալուստ Սահակյանը վստահ է, որ նոր վարչապետի թեկնածուի հարցը կարող է տարակարծություններ առաջացնել ոչ իշխանական ուժերի մոտ: «Նրանք նշում են, որ վարչապետը փոխվի: Ենթադրենք` վարչապետը փոխվեց, դրանից ի՞նչ կփոխվի, այլ հարց է, որ իրենք ինչ-որ մեկին առաջարկեն: Բայց հենց այդպիսի հարց բարձրանա, իրենց միջև կռիվ է լինելու, բաժանվելու են, քանի որ ամեն մեկը պիտի ասի թող մեզնից լինի թեկնածուն»,-ասաց Գալուստ Սահակյանը' այնուամենայնիվ, նշելով, որ խրախուսելի է այն, որ ուժերը ուզում են նոր որակներով հանդես գալ: