«Հայ կանանց ուխտ». պահանջում են Սերժ Սարգսյանի և Տիգրան Սարգսյանի հրաժարականները

2014 թվականի մարտի 13-ի դրությամբ Հայաստանում ունենք գրանցված 75 կուսակցություն: Ցանկում կան կուսակցություններ, որոնց գործունեությանը և նպատակներին հասարակության մի զգալի հատված ծանոթ չէ:

Լուրեր.com-ը սկսում է հարցազրույցների շարք, կուսակցությունների գործունեության և նպատակների մասին:

«Հայկանդուխտ» ավանդապաշտ ժողովրդավարական կուսակցությունը գործում է 1994-ի փետրվարի 21-ից: Կուսակցության անվանումն ունի իր գաղափարը, ըստ կուսակցության ղեկավարի` «Հայկանդուխտ»-ը հայ կանանց ուխտն է, կուսակցության անվան հիմքում կա Րաֆֆիի հերոսներից Հայկանդուխտի անունը, ում գլխավորությամբ էլ հայ կանայք ժամանակին ժայռերի ծերպերից կախել են թուրք տղամարդկանց` նրանց վրա ջուր լցրել, և այդպիսով, վրեժ լուծել:

Կուսակցության անվան ծագումնաբանության, կուսակցության գաղափարների, նպատակների և անելիքների մասին Լուրեր.com-ը զրուցեց կուսակցության հիմնադիր նախագահ Արմենուհի Ղազարյանի հետ:

-Կպատմե՞ք կուսակցության անվան ծագումնաբանության մասին:

-Կուսակցության անվան հիմքում «Հայկանդուխտը»` հայ կանանց ուխտն է, ինչպես նաև Րաֆֆիի հերոսներից Հայկանդուխտը, ում գլխավորությամբ հայ կանայք ժամանակին թուրքերին կախել են ժայռի ծերպերից, նրանց վրա ջուր լցրել, և այդպիսով, իրենց վրեժը լուծել:

Իսկ ավանդապաշտ ժողովրդավարական, որովհետև մենք մեր ավանդույթները պետք է պահպանենք, առանց մեր ավանդույթների և մեր արմատների, մենք չենք կարող որպես ազգ ու պետություն գոյություն ունենալ:

-Ի՞նչ գործունեություն եք այսօր ծավալում:

-«Դեպի Եվրասիական միություն» շարժման հետ ենք, դեպի Ռուսաստան կողմնորոշմամբ, զբաղվում ենք մարդկանց իրավունքների պաշտպանությամբ: Այս պահին դեմ ենք պարտադիր կուտակային կենսաթոշակին, այսօրվա սոցիալ-տնտեսական  իրավիճակն է անհանգստացնող, անհապաղ պահանջում ենք իշխանությունների հրաժարականը:

-Բողոքի ակցիաներին մասնակցո՞ւմ եք:

-Մասնակցում եմ, իհարկե, մասնակցում եմ:

-Դուք նշեցիք, որ իշխանությունների` Սերժ Սարգսյանի և կառավարության հրաժարականն եք պահանջում, Դուք նման հայտարարությամբ հանդես եկե՞լ եք, ի՞նչ քայլեր եք ձեռնարկել հրաժարականին հասնելու համար:

-Ընդհանուր, այո, հանդես ենք եկել: Պետք է գերհսկողություն սահմանելով ընտրություններ անցկացվեն, ժողովուրդն ում կընտրի` նրան էլ կընդունեմ:

-Կուսակցությունը քանի՞ անդամ, համակիր ունի:

Համակիրների քանակը շատ-շատ է: Մենք 94-ից առաջ ենք բերել խաբված ավանդատուներ շարժումը, երբ կոմերցիոն բանկերի կողմից, խաբվեցին հազարավոր ավանդատուներ: «Պայթեցին» բանկերը` մեկը մյուսի ետևից: Մինչև այսօր էլ այդ շարժման մասնակիցները մեր կուսակցության համակիրներն են:

-Ներքաղաքական իրադարձությունների մեջ ակտի՞վ եք:

-Այո, իհարկե: Եվրասիական Միության շարժման անդամ ենք, ինքս` նախագահության անդամ եմ, Թեքեյան մշակույթի կենտրոնում միջոցառումներ ենք կազմակերպում:

-Կուսակցությունը դրամական եկամուտներ ո՞ւնի: 

-Ցավոք սրտի, չունենք: Այդ պատճառով էլ չենք կարողանում լայնածավալ գործողություններ իրականացնել: Քաղաքական գործընթացներին մասնակցում ենք, բայց ինքուրույն չենք կարողանում որևէ բան ձեռնարկել, եթե մենք գումար ունենայինք, կարողանայինք ինքնուրույն մասնակցել, գլուխ չեմ գովում, բայց շատ բանի կարող էինք հասնել:

Միայն, այն, որ տարիներ շարունակ գլխավորեցինք խաբված ավանդատուների շարժումը, բազմահազար մարդիկ էին խաբվել, ամեն ուրբաթ ժամը երեքին հավաքվում էինք նախագահի նստավայրի և կառավարության մոտ: Անգամ դատարկ կաթսաներով ցույց արեցինք, գնացինք վարչապետի մոտ:

-Իսկ ի՞նչ օգուտ տվեցին այդ ակցիաները:

-Շատ մարդիկ գումարներ ստացան: Գիտե՞ք` ինչքան մարդիկ էին խաբված վիճակում հայտնվել: Նրանք թալանել էին մարդկանց, օրը ցերեկով` գրպանները մտել: Նույնն այսօր է կատարվում` պարտադիր կուտակային կենսաթոշակը նույն բուրգի սիստեմն է, նույն թալանչիությունը, հիմա էլ խաբված ավանդատուների փոխարեն, խաբված թոշակառուներ և խաբված երիտասարդներ կլինեն:

-Իսկ ի՞նչ եք կարծում, եթե այսօր Դուք չունեք ֆինանսական եկամուտներ և չեք կարողանում լայնածավալ գործողություն ծավալել, ավելի նպատակահարմար չէ՞ միանալ ընդդիմադիր որևէ կուսակցության և շարունակել պայքարը:

-Ես այդ մասին շատ եմ մտածել, բայց ցավում եմ, որ այսօր ընդդիմադիր դաշտում, դեռ չեմ տեսնում այն կայուն ուժը, որն իրոք այս երկրի համար պայքարի, բոլորն ինչ-որ անձնական նկրտումների համար են պայքարում, բոլորս էլ ունենք նկրտումներ անձնական, բայց չափանիշ գոյություն ունի:

Այսօր մենք բոլորս գերնպատակ պետք է ունենանք, համակարգային փոփոխություն անենք: Պետք է այսօրվա ապազգային Ազգային Ժողովը լուծարել, կառավարությունը փոխել, նոր ընտրություններ նշանակել, իրական հսկողություն սահմանել, որ արդարությունը գերիշխի, նոր դրանից հետո կորոշենք, ինչը որից հետո է, իսկ այսօր մեկի հետ խոսում ես, բոլոր ընդդիմադիրներն իրենց անձնական շահն են միանգամից տեսնում:

Ամեն մեկը ցանկանում է գեներալ դառնալ, զինվոր չկա, մելիքանց մելիք են բոլորն իրենց հռչակում, ցավը հենց դա է:

Ես շատ մեծ ցավ եմ ապրում, երբ հիշում եմ, որ ավանդատուները` 80,000-ից ավելի մարդ, եթե բազմապատկենք միջին ընտանքի անդամներով` 3-ով, տեսեք ինչ մեծ թիվ էր կազմում, նրանք խաբված էին:

Ես միայնակ այդ շարժումը ղեկավարեցի, որ կուսակցությանը դիմեցի, ոչ ոք հանձն չէր առնում:

Մարդկանց հետ պետք է լինել այնպես, որ քեզ վստահեն, որ հետո դու ասես, որ ես ընդդիմադիր եմ:

Գայանե Համբարձումյան