Հարություն Քուշկյանը նոր տեղակալ ունի

Արցախի Հանրապետության վարչապետ Արա Հարությունյանը մարտի 14-ին առողջապահության համակարգի աշխատակիցներին և լրագրողներին է ներկայացրել նախագահի հրամանագրով առողջապահության նախարար նշանակված Հարություն Քուշկյանին, ինչպես նաև իր որոշումը՝ Զոյա Լազարյանին նախարարի առաջին տեղակալ նշանակելու մասին: Ինչպես տեղեկացնում են ԼՂՀ կառավարության տեղեկատվության և հասարակայնության հետ կապերի բաժնից, կառավարությ ան ղեկավարը շնորհավորել և շնորհակալություն է հայտնել Հարություն Քուշկյանին ԼՂՀ առողջապահության նախարարությունը ղեկավարելու' նախագահի առաջարկն ընդունելու համար: Վարչապետը ողջունել է նաև Զոյա Լազարյանի որոշումը' շարունակել աշխատել համակարգում, և համոզմունք հայտնել, որ այդ երկու գործիչների միասնական աշխատանքի արդյունքում Արցախի առողջապահական համակարգը լուրջ ձեռքբերումներ է ունենալու:

Արա Հարությունյանը, ընդգծելով առողջապահության ոլորտի կենսական նշանակությունը հանրապետության համար և այդտեղ կատարված հսկայական աշխատանքները, համակարգի զարգացման, հետագա բարեփոխումների իրագործման և բնակչության շրջանում վստահության մակարդակի բարձրացման ճանապարհին կարևորել է նոր նախարարի նշանակումը: Գործադիրի ղեկավարի խոսքով՝ Հարություն Քուշկյանի փորձառությունն ու հմտությունները թույլ են տալու բարձրացնել ոլորտի զարգացմանը նվիրված՝ նախագահի նախընտրական և կառավարության ծրագրերի իրականացման արդյունավետությունը:

Իր խոսքում նորանշանակ նախարարը շնորհակալություն է հայտնել ԼՂՀ նախագահին բարձր վստահության համար' պատրաստակամություն հայտնելով աշխատել հանրապետության առողջապահական համակարգի զարգացման ծրագրերի կյանքի կոչման ուղղությամբ: Նա համոզմունք է հայտնել, որ թիմային աշխատանքով համակարգի ողջ անձնակազմը հասնելու է իր առջև դրված խնդիրներին: Նախարարի նորանշանակ առաջին տեղակալ Զոյա Լազարյանը իր հերթին շնորհավորել է Հարություն Քուշկյանին և վստահություն է հայտնել, որ նա ի վիճակի է լինելու ի մի բերել Արցախի և Հայաստանի հանրապետությունների առկա ներուժը տեղի առողջապահական համակարգը զարգացնելու ճանապարհին: