«Սև ջուր» լճի տարածքում երեկվանից անհետացած քաղաքացին ողջ գիշերն անց է կացրել գիշերային ակումբում` խրախճանքների մեջ. ուշագրավ մանրամասներ

Մինչ Արարատի մարզային Փրկարար ծառայության աշխատակիցները Երեւանից ժամանած համանուն ծառայության լրացուցիչ ուժերի հետ Սեւ ջուր (Կարասու) գետում երեկվանից որոնում էին Ռանչպար համայնքի բնակիչ, ազգությամբ եզդի, 32-ամյա Արմեն Խալիլովի դին, պարզվում է, որ կեղծ ջրահեղձը, ով գործատուի մոտ աշխատում է որպես հոտաղ, գողացել է նրա անասունները և իրացրել շուկայում: «Վաստակած» գումարով նա ողջ գիշերն անց է կացրել գիշերային ակումբում` խրախճանքների մեջ:

Այսօր` ժամը 16:30-ի սահմաններում, Խալիլովը Երեւանից տաքսի է վարձում, գալիս Սև ջրի ափ, շորերը կրկին թողնում գետի ափին, իրեն նետում գետը, եւ տաքսու վարորդի հետ փրկարարներին լուր ուղարկում, որ փնտրվող անձն այն կողմում է: Ոստիկանության և ազգային անվտանգության ծառայության այնտեղ հավաքված աշխատակիցների համար դժվար չէր պարզել կատարված «աճպարարությունը»: Խալիլովը ձերբակալված է, կատարվում է նախաքննություն:

Ինչպես «Արմենպրես»-ին տեղեկացրեց Արարատի մարզպետարանի աշխատակազմի հասարակայնության հետ կապերի բաժնի գլխավոր մասնագետ Քրիստինե Խաչատրյանը, առկա բոլոր տվյալներից պարզ է դառնում, որ երեկ, գետի ափին նախօրոք դրված շորերը, ոստիկաններին զբաղեցնելու համար էին, որպեսզի նրանք իրենց բոլոր ուժերը կենտրոնացնեն որոնողական աշխատանքների վրա' շեղելով ուշադրությունը կատարված գողությունից:

Արմեն Խալիլովը երեք երեխաների հայր է: Նա մարտի 13-ին` ժամը 16:00-ի սահմաններում, հարբած վիճակում նետվել է գետը` լողալու նպատակով: Խալիլովը փորձառու լողորդ է: