«Հրապարակ». Դժվար է մեկ օրում բոլորով ընդհանուր որոշման հասնել. Ռուբեն Հակոբյան

Երեկ ԱԺ ճեպազրույցներից հետո «Ժառանգություն» խմբակցության ղեկավար Ռուբիկ Հակոբյանի մոտ էր հավաքվել ԱԺ ոչ իշխանական «հրաշալի քառյակը»։ Հանդիպումը բաղկացած էր երկու մասից. առաջին մասում «Դեմ եմ» նախաձեռնության հետ քննարկել են մարտի 22-ի հանրահավաքի հարցը, իսկ երկրորդ մասում չորսի ներկայացուցիչներով՝ համագործակցության հետագա քայլերը։ Ռուբիկ Հակոբյանը լրագրողներին ասել է, որ քննարկել են նաեւ «կառավարությանն անվստահություն հայտնելու հետ կապված ծրագրերը»։ Նա նշել է, որ գաղտնիք չէ, որ ուժեր կան, մասնավորապես «Ժառանգությունը», որ ամբողջական իշխանափոխության հարց է դնում, բայց բոլորը չէ, որ համակարծիք են այս եւ մյուս հարցերի շուրջ։ «Ժամանակը չհերիքեց, որ ամբողջությամբ քննարկեինք հարցերը, կշարունակենք հաջորդ հանդիպմանը: Հաջորդ անգամ գոնե ճանապարհային քարտեզը կներկայացնենք:

Քննարկեցինք այն հարցերը, որոնք կային օրակարգում, նորից խոսք էր գնում ընդհանուր մոտեցումների մասին, այն մասին, որ առաջիկայում քաղաքական, տնտեսական ինչ պլատֆորմ ենք ներկայացնելու կառավարության հրաժարականի հետ կապված, եւ ընդհանրապես քննարկեցինք մեր համաձայնության հարթակը, թե ինչ հարցի շուրջ ենք ի վերջո որոշման գալու»,- ասել է Հակոբյանը:

Հարցին, թե ինչն է խանգարում ավելի արագ ինչ-որ ընդհանուր եզրահանգման գալ ու որոշել՝ հայտնե՞լ անվստահություն կառավարությանը, թե՞ ոչ, Ռուբեն Հակոբյանն ասել է, որ իրենք շտապելու խնդիր չունեն, սա բարդ գործընթաց է, ու դժվար է մեկ օրում բոլորով ընդհանուր որոշման հասնել, քանի որ տարբեր ուժեր են՝ տարբեր դիրքորոշումներով։

Շարունակությունը` «Հրապարակ» օրաթերթի այսօրվա համարում: