«Ժողովուրդ». Վարդան Ղուկասյանի եղբորորդու գործով առաջին դատական նիստը հետաձգվեց

Երեկ Շիրակի մարզի ընդհանուր իրավասության դատարանում կայացավ Գյումրիի նախկին քաղաքապետ Վարդան Ղուկասյանի եղբորորդու՝ Վահե Ղուկասյանի գործով առաջին դատական նիստը, որը հետաձգվեց մինչեւ մարտի 19-ը: Նշենք, որ մինչ դատական նիստը «Ժողովուրդ»-ին տեղեկություններ էին հասել, որ նախորդ օրը երեկոյան Վահե Ղուկասյանին Նուբարաշենի քրեակատարողական հիմնարկից տեղափոխել են Արթիկի ՔԿՀ, որտեղ Ղուկասյանները մի մեծ կերուխում են սարքել: «Ժողովուրդ»-ի հետ զրույցում, սակայն, Արթիկի ՔԿՀ պետ Գեւորգ Մկրտչյանը հավաստիացրեց, թե նման բան չկա.«Ես ձեզ վստահեցնում եմ. անձամբ եմ ընդունել Վահե Ղուկասյանին եւ նրան բացատրել եմ ՔԿՀ-ի կանոնները: Ավելին կարող եմ ասել, որ Ղուկասյաններից ոչ ոք այստեղ չի եղել»:

«Ժողովուրդ»-ի հետ զրույցում Վարդան Ղուկասյանի եղբայրը` Գեւորգ Ղուկասյանն էլ ասաց, թե իրենցից ոչ ոք դատական նիստին ներկա չի եղել, իսկ թե ինչու, չմանրամասնեց. «Ես դատարան չեմ գնում»:

Հիշեցնենք, որ 2013 թ. ապրիլի 23-ին՝ Ժամը 13.00-ին, Գյումրի քաղաքի Շիրակացի 54բ շենքի մոտ կրակոցներ էին հնչել: Հրազենային վնասվածքներով հիվանդանոց էին տեղափոխվել Հարություն Խաչատրյանը (Քավոր Հարութ) եւ Արտյոմ Կարապետյանը (Շեկո), ով հիվանդանոցում մահացել էր: Ապրիլի 24-ին ոստիկանության Գյումրիի բաժնում 24-ամյա Վահե Ղուկասյանը խոստովանել էր, որ նշված հանցագործությունը կատարել է ինքը:

Շարունակությունը` «Ժողովուրդ» օրաթերթի այսօրվա համարում: