«Հրապարակ». Աննախադեպ զվարճալի իրադարձություն. ԲՀԿ-ի՝ Ֆեյսբուքում հայհոյող, հաստիքով աշխատող ֆեյքերը կենդանություն են առել

«Հայկական ժամանակ» թերթի և «1in.am»-ի խմբագրությունների առջև երեկ տեղի է ունեցել աննախադեպ զվարճալի բան: Մի խումբ կուշտ փորերով երիտասարդներ այս խմբագրությունների առջև ինքնաբուխ դհոլ են խփել՝ այդպիսով արտահայտելով իրենց ցասումն առ նշված լրատվամիջոցների խմբագիրներ: Ենթադրություններ եղան, որ նրանց ակցիա անելու դրդապատճառը ՀԱԿ-ԲՀԿ «կոնսոլիդացիային», մասնավորապես Գագիկ Ծառուկյանին ուղղված քննադատությունն է, որն այն աստիճան է խոցել, որ ԲՀԿ-ի՝ Ֆեյսբուքում հայհոյող, հաստիքով աշխատող ֆեյքերը կենդանություն են առել ու «գաղափարական» հակառակորդների դեմ պայքարը տեղափոխել փողոց:

«Դհոլ, դհոլ» վանկարկումներով, դհոլ զարկելով, փուչիկներով շարժվել են նշված խմբագրություններ: Մոտ 50 հոգանոց անսամբլին առաջնորդել է մի հաստլիկ գանգրահեր տղա: Թե որտեղից են, ինչ են ուզում, և ով է իրենց գլխավորը, ոչինչ չեն խոստովանել: Նրանցից մեկն իրենց անսամբլի միսիայի մասին ասել է, թե ընդամենը գիտի, որ եկել են պայքարելու «դհոլչի պատգամավորների» դեմ, «ոչ կազմակերպություն է, ոչ էլ կազմակերպիչներ կան»,-ասել է մի դհոլչի: ԲՀԿ-ի կամ որևէ ուժի պատկանելու վերաբերյալ որևէ խոստովանություն չեն արել: Դհոլը ձեռքները վերցնելու քաղաքական դրդապատճառների մասին մատնել է թիրախների ընտրությունը, իսկ փաստարկն այն է, որ ինքնաբուխ համերգի մասին առաջինը տեղեկացել է ԲՀԿ-ի սեփական «Կենտրոն» հեռուստաընկերությունը և ուղեկցել նվագախմբի տղաներին:

«Հայկական ժամանակի» թողարկման պատասխանատու Հայկ Գևորգյանն այս միջադեպի մասին խոսեց զարմանքով. «Չիմացանք, թե ովքեր էին ու ինչ նպատակով էին եկել»: Ըստ Հայկ Գևորգյանի նկարագրածի, նրանք եկել, խմբագրության մոտով բավականին անցել են, նրանցից մեկը հուշել է խմբագրության տեղը, հետ են եկել և սկսել դհոլ զարկել: Հարցին, թե արդյո՞ք կապ ունեն որևէ քաղաքական ուժի հետ, Հայկ Գևորգյանն ասաց՝ չգիտեմ, իսկ ԲՀԿ-ի մասնակցության առնչությամբ նշեց այն, որ նվագախմբի տղաներին ուղեկցում էր միայն «Կենտրոն» հեռուստաընկերությունը:

Իսկ «Առաջին» լրատվականի խմբագիր Արման Բաբաջանյանն ասաց. «Կասկած չունեմ, որ դա քաղաքական ակցիա էր լրատվամիջոցի դեմ՝ կոնկրետ ուղղորդված «Բարգավաճ Հայաստան» կուսակցության կողմից: Մեր աշխատանքը խաթարելու նպատակ էր հետապնդում, ինչն իրենց չի հաջողվել, մենք մեր աշխատանքը շարունակում ենք բնականոն հունով: Լրատվամիջոցի դեմ շատ ծանոթ ձեռագիր էր, նախկինում «Հայկական ժամանակի» դեմ իրենք նման ակցիա էլի էին արել: Դա իշխանությունից չտարբերվող քայլ էր, և կանխատեսելի էր ամեն ինչ»: Բացի կանխատեսելիությունից, պարզել են նաև մասնակիցների քաղաքական պատկանելությունը: «Մասնակիցների մեջ նաև ԲՀԿ-ական պատգամավոր Վահե Էնֆիաջյանի օգնականն էր, այսինքն, իրենց կուսակցության վազող երիտասարդները»,-ասաց մեր զրուցակիցը՝ ավելացնելով, որ որևէ պատասխան չեն պատրաստվում տալ, շարունակելու են աշխատել, ինչպես միշտ:

Շարունակությւոնը` «Հրապարակ»-ի այսօրվա համարում:

Լուսանկարը` «ՀԺ»-ի