«Հրապարակ». Չնայած ընդդիմության ճամբարում խառնաշփոթ է, միևնույն է, իշխանության մոտ ներքին տագնապ կա

Չնայած ընդդիմության ճամբարում խառնաշփոթ է, եւ 10 հոգով 15 երգ են երգում, սակայն պետք է արձանագրել, որ Ծառուկյանի նախաձեռնած հանդիպումները բավականին աշխուժություն են մտցրել քաղաքական դաշտում: Եվ պառակտված ու հեղինակազրկված կուսակցությունների ռեաբիլիտացիայի շանս է առաջացել:

Պետք չէ կասկածել, որ կուսակցությունների գործունեությունից, թվում է, վերջնականապես հիասթափված քաղաքացին ուշադիր հետեւում է այդ գործընթացներին եւ պատրաստ է կրկին վստահել ու հավատալ, եթե ոչ իշխանական ուժերն իրենց մեջ ուժ գտնեն եւ նորանան: Եթե համախմբվեն ու իրենց ետեւից գնացող ժողովրդին հստակ ծրագիր առաջարկեն, քայլերի իրականանալի հաջորդականություն: Թերեւս սա գիտակցում է նաեւ իշխող մեծամասնությունը, որը եւս ուշիուշով հետեւում է պրոցեսներին եւ չնայած թվացյալ անտարբերությանը, լավ էլ անհանգստացած է:

Թեպետ Գալուստ Սահակյանի աչալուրջ հսկողության ներքո ՀՀԿ «սահմանապահները» հեգնում ու հումորի են վերածում ոչ իշխանականների միասնության ձգտումները, միեւնույն է՝ նրանց հիստերիան անզեն աչքով նկատելի է: Մի բան պարզ է, որ ներքին տագնապ կա, եւ իշխանությունը հասկանում է, որ օր օրի սպառում է հասարակության վստահության վերջին ռեսուրսները: Եվ մարդիկ հոգնել են ոչ միայն կարիքից ու գործազրկությունից, ոչ թե գազի ու հոսանքի գներն են նրանց վրդովվեցնում, եւ ոչ այնքան առաջընթացի բացակայությունն է ստիպում արտագաղթել, որքան իշխանության ներկայացուցիչների ցինիզմը, անպատժելիությունը, հասարակության նկատմամբ արհամարհանքը: Զիջումների չգնալու համառությունը: Հասարակության կարծիքը որեւէ հարցում հաշվի չառնելու արատավոր պրակտիկան: Երկրի շահերին հակասող որոշումների ընդունումը: Ապագայի հանդեպ անտարբերությունը:

Շարունակությունը` «Հրապարակ» օրաթերթի այսօրվա համարում: