Երևանում «Փարաջանով» ֆիլմի մեծ էկրան բարձրանալուն մնացել են հաշված օրեր

Հայաստանի, Ուկրաինայի, Ֆրանսիայի և Վրաստանի համատեղ արտադրությամբ ստեղծված «Փարաջանով» լիամետրաժ գեղարվեստական ֆիլմին երևանյան հանդիսատեսը երկար սպասեց: 2013 թ. ՀՀ նախագահի կողմից պետական մրցանակի արժանացած ֆիլմի կինավարձույթում հայտնվելու գործընթացը երկարաձգվեց, սակայն մեծանուն կինոռեժիսորի արվեստի սիրահարները ժապավենը Երևանում դիտելու հնարավորություն կունենան շատ շուտով' մարտի 22-ից սկսած, «Մոսկվա» կինոթատրոնի էկրանին: Ֆիլմի գլխավոր դերակատար և պրոդյուսեր Սերժ Ավետիքյանը Փարիզից «Արմենպրես»-ի թղթակցի հետ զրույցում նշեց, որ «Փարաջանովը» Խանտի Մանսիյսկում անցկացված կինոփառատոնում երկու շաբաթ առաջ արժանացել է կինոքննադատների մրցանակին, ինչպես նաև ստացել է արծաթե մրցանակ:

«Սա նշանակում է, որ ֆիլմի կինովարձույթը Ռուսաստանում ապոհովված է վերջապես, դա կլինի մայիսին: Իսկ Ֆրանսիայում այն նախատեսված է սեպտեմբերին: Կարծում եմ, որ ֆիլմն իր ճանապարհին հանդիպում է ոչ միայն հայ, վրացի կամ ուկրաինացի կինոսերների, այլ նաև այնպիսի հանդիսատեսի, որը Փարաջանովին չգիտի»,-նշեց Ավետիքյանը' հավելելով, որ երիտասարդ սերունդն այսօր հաճախ չգիտի Պազոլինիին, Ֆելինիին, Բերգմանին, Տարկովսկուն և կինոյի ոլորտին առնչվող շատ այլ հանրահայտ անունների: «Հենց ադ պատճառով էլ ֆիլմը մեծ դեր է խաղում նոր սերնդի համար»,-պարզաբանեց Կաննի կինոփառատոնի դափնեկիրը:

Նախքան մեծ էկրաններ բարձրանալը «Փարաջանովը» հսկայական փառատոնային ուղի է անցել: Հունվարի 24-ին ֆիլմը ներկայացվել է Անժե քաղաքի փառատոնին: Փետրվարի 1-ին' Փարիզի արվարձաններից մեկում այն մասնակցել է «Լոնգրուայի մրցանակ» արարողությանը:

«Փարաջանովը» ներկայացված է եղել 2013 թ. սեպտեմբերի 19-23-ն անցկացվող Բաթումի կինոփառատոնի մրցութային միջազգային ծրագրում, Համբուրգի և եվրոպական մասշտաբի այլ փառատոններում:

Ուկրաինան «Լավագույն օտարալեզու ֆիլմ» անվանակարգում առաջադրել էր «Փարաջանով» ֆիլմն Ամերիկյան կինոակադեմիայի 2013 թվականի «Օսկար» մրցանակի համար: Օդեսայի 4-րդ կինոփառատոնում «Փարաջանով» գեղարվեստական ֆիլմը ճանաչվել էր լավագույն լիամետրաժ ֆիլմ և ստացել «Զոլոտոյ Դյուկ» մրցանակը: Մասնագիտական ժյուրիի դրական գնահատականից բացի, այն արժանացել էր նաև հանրության հավանությանը: Չորս համաարտադրող երկրներից միայն Ուկրաինայում է ֆիլմը հայտնվել կինովարձույթում դեռ 2013 թ. հոկտեմբերից:

Կինոժապավենի համաշխարհային պրեմիերան A խմբի փառատոների շարքում «East of the West» մրցութային ծրագրի շրջանակում կայացել է այս տարվա հուլիսին Կարլովի Վարի փառատոնում: «Փարաջանովը» հայ հանդիսատեսի դատին առաջին անգամ ներկայացվեց 2013թ. հուլիսին «Մոսկվա» կինոթատրոնում' հոբելյանական «Ոսկե ծիրան» փառատոնի փակման հատուկ ցուցադրմամբ: