Հայաստանին ձեռնտու է Իրանի հավասարակշռված քաղաքականությունը Ռուսաստանի և Արևմուտքի հետ

Քաղաքագետ Հրանտ Մելիք-Շահնազարյանը համոզված է, որ Հարավային Կովկասում Իրանի ակտիվությունը լրացուցիչ գործոն է տարածաշրջանում անվտանգությունն ապահովելու համար: «Իրանը պատմականորեն կայունացնող դերակատարություն է ունեցել իր հարակից տարածաշրջաններում, և հայ-ադրբեջանական պատերազմի վերսկսումը մարտահրավեր է դիտվում նաև պաշտոնական Թեհրանի կողմից: Եթե նրանք ունենան ավելի մեծ ազդեցություն այդ գործընթացների վրա, ա ձեռնտու է Հայաստանի համար, քանի որ Թեհրանն ամեն ինչ անելու է պատերազմի սկսումը կանխելու համար»,-«Արմենպրես»-ի փոխանցմամբ` լրագրողների հետ հանդիպման ժամանակ ասաց քաղաքագետը:

Բացի դրանից` Հայաստանի համար տնտեսապես և քաղաքականապես ձեռնտու է Իրանի` Արևմուտքի հետ հարաբերությունների ճգնաժամից դուրս գալը: «Այն, որ Իրանը դուրս է գալիս Արևմուտքի հետ հարաբերությունների ճգնաժամային իրավիճակից, կարելի է գնահատել դրական զարգացում նաև Հաայստանի համար: Լինելով շրջափակված Ադրբեջանի և Թուրքիայի կողմից` մեզ ձեռնտու է, որ մեր մյուս երկու հարևանների հետ տնտեսական-քաղաքական հարաբերություններն ավելի ինտենսիվ զարգանան: Եթե այս ամենին գումարենք տնտեսական միջանքի հնարավորությունները, որ Հայաստանը կստանա, երբ Իրանն իր հարաբերությունները կկարգավորի Արևմուտքի հետ ու իր ապրանքները կտանի այնտեղ վաճառելու, տնտեսական ու քաղաքական տեսանկյունից Հայաստանի համար դրական փոփոխություն կմատնանշի»,-փաստեց քաղաքագետը:

Հրանտ Մելիք-Շահնազարյանի կարծիքով' Իրանը միաժամանակ հավասարակշռված հարաբերություններ կպահպանի Ռուսաստանի և Արևմուտքի հետ: «Որքան էլ հարաբերությունները Արևմուտքի հետ լավանան, Իրանը կփորձի ինչ-որ չափով հավասարակշռել դերակատարությունը Արևմուտքի և Ռուսաստանի միջև, և մրցակցությունը մեր տարածաշրջանից հեռու կտանի, որը Հայաստանի համար հետաքրքրիր հեռանկար է բացում»,-ասաց քաղաքագետը:

2013թ. նոյեմբերի 24-ին Ժնևում «վեցյակի» ներկայացուցիչները Իրանի հետ պայմանավորվել են, որ վերջինս կսահմանափակի ուրանի հարստացումը Թեհրանի հանդեպ գործող միջազգային պատժամիջոցների մեղմացման դիմաց: