Վիլյամ Սարոյանի գործերի մոտիվներով «Կիսալուսնի ծովածոցը» ֆիլմը մեծ էկրանին կլինի շուտով (տեսանյութ)

«Պարալլելս ֆիլմ» (Parallels Film) անկախ կինոընկերությունը, «Շարմ» հոլդինգը և Հայաստանի ազգային կինոկենտրոնը մարտի 27- ին «Մոսկվա» կինոթատրոնում կներկայացնեն ռեժիսոր Մարինե Զաքարյանի «Կիսալուսնի ծովածոցը» ֆիլմը: Ֆիլմի պրեմիերան նախատեսված էր մարտի սկզբին, սակայն այն փոքր-ինչ երկարաձգվեց: Ինչպես տեղեկացնում են Հայաստանի ազգային կինոկենտրոնի մամուլի ծառայությունից, երևանյան պրեմիերայից հետո «Կիսալուսնի ծովածոցը» կցուցադրվի Երևանյան կինոթատրոններում, կներկայացվի «ՀԱՅԱԿ» ազգային կինոմրցանակաբաշխությանը, ապա' Կաննի կինոշուկայում: «Կիսալուսնի ծովածոցը» Վիլյամ Սարոյանի ստեղծագործությունների վրա հիմված, չորս կինոնովելից կազմված լիամետրաժ խաղարկային ֆիլմ է, որի գործողությունները ծավալվում են Կիսալուսնի ծովածոց կոչվող մտացածին քաղաքում: Հերոսները պատանիներ են, որոնց անկեղծ ու ազնիվ հայացքը կյանքին' ֆիլմի հիմնական առանցքն է: Ֆիլմը հասունացման մասին է, երբ հերոսները ձեռք են բերում ամենակարևոր բանն աշխարհում' հասկանալու կարողությունը: Տարվա չորս եղանակներին ծավալվող պատմությունները դառնում են գովք' Աստծու ստեղծած աշխարհին և Մարդուն: «Պարալլելս ֆիլմ» կինոընկերությունը 2012թ. սկսել է հեղինակների առաջին ֆիլմերին աջակցության ծրագիր' ջանալով օժանդակել հայկական նոր կինոալիքի ձևավորմանը: 2012թ. ընկերությունը դիմել է Վիլյամ Սարոյանի գրական ժառանգության իրավատեր Սթենֆորդի համալսարանի ղեկավարությանը և 2013-ին անգլիական Pollinger ltd-ից ստացել է Սարոյանի պատմվածքների էկրանավորման իրավունքը: Նույն թվականին' Մոսկվայի 35-րդ միջազգային կինոփառատոնում, կայացել է «Փասիանի որսորդը» կարճամետրաժ ֆիլմի պրեմիերան, որը «Կիսալուսնի ծովածոցը» ֆիլմի «Աշուն» հատվածն է: 2013-ին «Փասիանի որսորդը» ստացել է Ազգային կինոմրցանակաբաշխության ՀԱՅԱԿ մրցանակը' «Լավագույն դեբյուտ» անվանակարգում: Մասնագետների գնահատմամբ` Մարինե Զաքարյանի ֆիլմը աչքի է ընկնում դասական գրողի ժառանգության հանդեպ հոգատարության ու ինքնուրույն մեկնաբանության համադրմամբ, ինչպես նաև տեխնիկական թարմությամբ և թվային տեխնոլոգիաների համարձակ կիրառմամբ: 2012-ից ֆիլմի արտադրությանն աջակցել է Հայաստանի ազգային կինոկենտրոնը' դեբյուտային ֆիլմերի աջակցության ծրագրով: 2013-ին «Պարալլելս Ֆիլմ» կինոընկերությունը և «Շարմ» հոլդինգը միավորել են իրենց միջոցները' ֆիլմի արտադրությունն ավարտելու համար: Ֆիլմի օպերատորն է Միհրան Ստեփանյանը, կոմպոզիտորը' Լիլիթ Նավասարդյանը, հնչունային ռեժիսորը'Լևոն Նավասարդյանը: Ֆիլմում օգտագործված է Come on-a my house երգը' Վիլյամ Սարոյանի խոսքով, Ռոզ Բաղդասարյանի երաժշտությամբ, որում հնչում է Սարոյանի ձայնը: Ֆիլմի պրոդյուսերներն են Հովհաննես Գալստյանը, Գևորգ Գևորգյանը, Կարեն Ղազարյանը: Ֆիլմում նկարահանվել են Սոս և Կարեն Ջանիբեկյանները, Աշոտ Ադամյանը, Նանոր Պետրոսյանը, Վիվիեն Բաստաջյանը, Նարինե Գրիգորյանը, Արա Սարգսյանը, Վարդուհի Ռուշանյանը, Մովսես Ստեփանյանը, Կարեն Խաչատրյանը: Պատանիների դերերում նկարահանվել են Սամվել Վարդանյանը, Ալեքս Բաբայանը, Անի և Սոնա Գալստյանները, Սարգիս Հարությունյանը, Աստղիկ Վարդանյանը, Ամալյա Զաքարյանը: