Գալիս եմ Համազգային շարժման ակունքներից. Հայոց կանայք, պատահական կանայք չեն. «Կանայք Հայոց աշխարհի» կուսակցություն

2014 թվականի մարտի 13-ի դրությամբ` Հայաստանում ունենք գրանցված 75 կուսակցություն: Ցանկում կան կուսակցություններ, որոնց գործունեությանը և նպատակներին հասարակության մի զգալի հատված ծանոթ չէ:

Լուրեր.com-ը սկսում է հարցազրույցների շարք, կուսակցությունների գործունեության և նպատակների մասին:

«Կանայք Հայոց աշխարհի» կուսակցության հիմնադիր նախագահն է Ժանետա Մանուկյանը: Մանուկյանը Լուրեր.com-ի հետ զրույցում ասաց, որ կուսակցության հիմքում եղել է 1993-ին ստեղծված կանանց շարժումը, մանկավարժների գործադուլը:

-Կպատմե՞ք կուսակցության անվան ծագումնաբանության մասին:

-Ես գալիս եմ Հայոց Համազգային շարժման ակունքներից: Նախքան կուսակցության ստեղծումը, ղեկավարել եմ կանանց շարժումը: 

Պայքարել ենք ի սկզբանե, պայքարել ենք Հայոց համազգային շարժման ստեղծման օրից, Արցախի պատերազմից:

Պայքարը շարունակել ենք 1993-ին, երբ սկսվեց մանկավարժների գործադուլը, ինքս էլ մանկավարժ էի: Գործադուլը տևեց մի քանի ամիս, պահանջ դրվեց աշխատավարձի բարձրացման: Այդ ընթացքում ակնթարթային կերպով բենզինի գները թանկացել էր, աշխատավարձերը չէր բավականացնում:

Շարժումն այնքան էր ծավալվել, որ 1993-ից հետո էլ շարունակվեց: Կարողացանք որոշ հարցեր կարգավորել, բայց թերի մնացած հարցեր էլ կային, կանանց խումբը որոշեց, որ պայքարը պետք է քաղաքական ճանապարհով շարունակել:

Որոշվեց, որ պետք է մանկավարժների շարժումից հետո կանանց կուսակցություն ստեղծել, քննարկում եղավ, և ընդհանուր հայտարարի եկանք, որ կուսակությունը կոչվի «Կանայք հայոց աշխարհի», քանի որ դա ամենագեղեցիկ անունն է, իսկ մեր խորհրդանիշը Մայր Հայաստանն է:

-Ներքաղաքական իրադարձությունների մեջ ակտի՞վ եք:

-Երեք անգամ մասնակցել ենք Ազգային ժողովի ընտրություններին, չենք կարողացել պատգամավորներ ունենալ, որովհետև բոլորս գիտենք` Հայաստանում ընտրություններն ինչպես են տեղի ունենում, դրանից հետո համագործակցել ենք «Հայաստանի առաջադիմական կոմունիստական կուսակցության» հետ, հանձին Վազգեն Սաֆարյանի:

Հանրային խորհրդում ունենք մեր կանայք, ինքս Հանրային խորհրդի ենթահանձնաժողովի անդամ եմ: Մենք մասնակցում ենք հանրությանը հուզող բոլոր խնդիրների քննարկումներին, ինչ դիմումներ, որ ստանում ենք, ակտիվ մասնակցում ենք:

-Կուսակցությունը քանի՞ անդամ, համակիր ունի:

-Մենք ունեցել ենք 2000-ից ավել համակիրներ, սակայն չենք կարողացել կանանց աշխատանքով ապահովել, այժմ էլ անաշխատունակ կանայք շատ ունենք, մեր համակիրները ոչ միան մանկավարժներ են, այլ նաև տարբեր բնագավառի, ցածր խավից մինչև բարձր խավ:

Քանի որ մենք չենք կարողացել այս իշխանությունների ժամանակ ապահովել նրանց սոցիալական և աշխատանքաին հարցերը, այժմ նրանք մի քիչ պասիվ են:

Կանայք կան, բայց քիչ են, պասիվ են, հավատը պետք է վերականգնել, իսկ հավատը վերականգնելու համար պետք է համապատասխան քայլ կատարենք:

-Կուսակցությունը դրամական եկամուտներ ո՞ւնի:

-Ոչ, չունենք: Մենք,երբ ընտրություններին մասնակցում ենք, դիմում ենք համապատասխան գործարար մարդկանց, նրանք օգնություն են ցուցաբերում, նվիրատվություն չեմ կարող ասել, բայց օգնում են, որ մենք իրավունք ձեռք բերենք ընտրություններին մասնակցելու: Իսկ երբ մասնակցում ենք դաշինքով, դաշինքի ղեկավարներն են օգնում մեզ:

-Իսկ ի՞նչ եք կարծում, եթե այսօր Դուք չունեք ֆինանսական եկամուտներ և չեք կարողանում լայնածավալ գործողություն ծավալել, ավելի նպատակահարմար չէ՞ միանալ ընդդիմադիր որևէ կուսակցության և շարունակել պայքարը:

-Հարցը շատ տեղին է, հիմա բանակցություններ ենք վարում, բայց չեմ կարող ասել` կոնկրետ որ ուժի հետ: Բանակցություններ ենք դեռ վարում, տեսնենք, որ դաշտի հետ մենք կկարողանանք համագործակցել:

Լինի ընդդիմադիր, թե դիմադիր, մենք պետք է տեսնենք, թե մեր հարցերը, որ դաշտում կարող ենք կարգավորել: Մեզ համար դա էական նշանակություն ունի:

-Այսինքն` հնարավո՞ր է համագործակցություն կոալիցիոն ուժերի հետ` ՀՀԿ, ՕԵԿ:

-Հայոց կանայք, պատահական կանայք չեն, մենք պատրաստված, լուրջ կանայք ենք:

Մենք մեր բոլոր հարցերը բարձրաձայնել ենք, որը կարողացել ենք առանց օգնության լուծել ենք մեր ուժերի չափով, բայց գլոբալ հարցեր կան, որ պետք է համախմբվել և միություններ կազմել:

Մենք դեռևս այդ միության մեջ չենք: Բանակցությունները դեռ ընթանում են, երբ վերջնական որոշման գանք, հարկ եղած դեպքում` հայտարարությամբ հանդես կգանք:

-Այսօր ներքաղաքական իրավիճակում լարված մթնոլորտ է: Բողոքի ակցիաներ են լինում ընդդեմ պարտադիր կուտակային կենսաթոշակի համակարգի, ընդդեմ Հայաստանի Մաքսային միությանն անդամագրվելուն, ընդդեմ գազի պայմանագրի: Ո՞րն է այս հարցերի շուրջ Ձեր կուսակցության դիրքորոշումը. կուսակցության անդամները մասնակցո՞ւմ են բողոքի ակցիաներին:

-Մեր մասնակիցների մեծ մասը մասնակցում են կուտակայինի դեմ բողոքի ակցիաներին, իրենց ցանկությամբ` կամավորական սկզբունքով:

Մենք մեր համագործակցությունն ընդդիմադիր դաշտի հետ, ուրիշ կերպ ենք պատկերացնում: Ես գտնում եմ, որ պետք է ոչ թե բուռն միտինգային ձևով խնդիրները լուծել, այլ բանակցային: Մենք այդ ժամանակները լրիվ անցել ենք, նորից նույն դասն անցնել, անիմաստ ենք համարում:

Մենք գտնում ենք, որ ըննդիմադիր դաշտի և իշխանության կարևոր ներկայացուցիչները պետք է նստեն կլոր սեղանի շուրջ, դիտորդներ էլ պետք է լինեն այլ կուսակցություններից, ովքեր ԱԺ-ում չունեն ներկայացուցչներ, միասին նստեն կլոր սեղանի շուրջ:

Ժողովրդին հանել փողոց, որ հետո պրովոկացիա լինի, մենք դեմ ենք, ինչ էլ որ լինի, ընդդիմադիր դաշտից էլ, դիմադիր դաշտից էլ նույն երեխաները, ամուսիններն ու եղբայրներն են տուժելու: Մեզ մոտ այդ քննարկումը եղել է:

Այժմ հայտարարություն ենք նախապատրաստում, մեր խնդրանքը դա է, որ բանակցային սեղանի շուրջ նստեն, քննարկումները լինի կառավարական մակարդակով, ոչ թե ժողովրդին խառնեն, ժողովրդի պահանջը բոլորս էլ գիտենք:

Գայանե Համբարձումյան