ԼՂ հիմնահարցի լուծումը՝ Ղրիմի իրադարձությունների ֆոնին. Շարմազանովի անդրադարձը

Այսօր «Ազդակ» ակումբում պատասխանելով Ղրիմի և Լեռնային Ղարաբաղի հիմնահարցերի նմանությունների մասին հարցին, ԱԺ փոխնախագահ, ՀՀԿ խոսնակ Էդուարդ Շարմազանովը ասել է. ՛՛Հայաստանի իշխանությունների կարծիքը երեկ ԱԳ նախարար Էդուարդ Նալբանդյանը հնչեցրել է՝ մենք ուկրաինական ճգնաժամի խաղաղ լուծման կողմնակից ենք և մշտապես ՀՀ-ն Ուկրաինան համարել է բարեկամ երկիր, ինչպես Ռուսաստանն է Ուկրաինային համարում բարեկամ երկիր: Մենք գտնում ենք, որ որևէ ռադիկալ միջոց հարցի լուծման լավագույն ճանապարհը չէր և մենք շարունակում ենք կարծել, որ յուրաքանչյուր խնդիր պետք է լուծվի խաղաղ բանակցությունների և ՄԱԿ-ի կանոնադրության շրջանակներում»:

Անդրադառնալով Ղրիմի հանրաքվեին՝ Շարմազանովը հայտարարեց. «Անկախ նրանից, թե արևմուտքում կամ արևելքում, հյուսիսում կամ հարավում ինչպես են վերաբերվում Ղրիմի հանրաքվեին, փաստը հետևյալն է, որ թե Ղրիմի օրինակը, թե Աբխազիայի, Հարավային Օսեթիայի, Արևելյան Թիմորի և Կոսովոյի նախադեպերը մի բանի մասին են վկայում. աշխարհը գնում է ազգերի ինքնորոշման իրավունքի հաղթարշավի ճանապարհով: Յուրաքանչյուր ժողովրդի անքատկելի իրավունքն է՝ որոշել սեփական ճակատագիրը:

Անդրադառնալով Լեռնային Ղարաբաղի հիմնահարցի հետ տարվող զուգահեռներին՝ Էդուարդ Շարմազանովը ընդգծեց. «ԼՂ-ն իրականացրել է երկու որոշում՝ ժողովրդի կամաարտահայտության միջոցով, մեկը եղել է Մայր Հայրենիքին միավորվելու որոշումը, մյուսը՝ 1991 թվականի դեկտեմբերի 10-ի հանրաքվեն, երբ Արցախի ժողովուրդը որոշեց ինքնորոշվել և անկախություն հռչակել: Նախադեպերի առումով պետք է նշեմ, որ որևէ երկիր ավելի շատ իրավունքներ չունի, քան Լեռնային Ղարաբաղը, այն այսօր փաստացի անկախ պետություն է և անկախ նրանից, թե ինչ դիրքորոշում կունենան այս հարցում Թուրքիան կամ Ադրբեջանը՝ Հայաստանը գնալու է այդ ճանապարհով»: