«Ժողովուրդ». ՊԵԿ-ը տուգանել է Կառավարության ու Սերժ Սարգսյանի նախագահությամբ գործող հիմնադրամներին

Պետական եկամուտների կոմիտեն վերջին օրերին «ընկել է հիմնադրամների հետեւից»: Մասնավորապես Գագիկ Խաչատրյանի ղեկավարած Պետեկամուտների կոմիտեն տուգանել է ոչ ավել ոչ պակաս ՀՀ կառավարության ու Սերժ Սարգսյանի նախագահությամբ գործող հիմնադրամներին:

Գագիկ Խաչատրյանը բացի մանր ու միջին բիզնեսի ներկայացուցիչներին հետեւողականորեն «սնանկացնելուց», նաեւ որոշել է «բալանսը պահելու համար» սիմվոլիկ տուգանքների ենթարկել հիմնադրամներին:

մարտի 12-ին «Հայաստանի շախմատի ակադեմիա» հիմնադրամը, որը հովանավորվում է ՀՀ կառավարության կողմից, տուգանքի է ենթարկվել: Բանն այն է, որ հիմնադրամի լիազորված անձ, փոխտնօրեն Վարդուհի Սարգսյանը փետրվարի 19-ին Հայաստան է ներմուծել 10 կգ էլեկտրական միացուցիչներ: Ներմուծած այդ իրերը փետրվարի 21-ին տեղափոխել է իրենց պատկանող տարածք, սակայն սահմանված ժամկետում հայտարարագիր չի ներկայացրել: Այս արարքի համար «Հայաստանի Շախմատի ակադեմիա» հիմնադրամի փօխտնօրեն Վարդուհի Սարգսյանը տուգանվել է 50.000 դրամով: 

«Ժողովուրդ»-ը փորձեց Վարդուհի Սարգսյանից պարզել. ինչո՞ւ ժամանակին հայտարարագիրը չի ներկայացվել, որի համար տուգանք է նշանակվել: Վ. Սարգսյանը հաստատեց տեղեկությունը, որ իրեն տուգանել են, ապա հավելեց, որ հիմնադրամն արդեն վճարել է Պետական եկամուտների կոմիտեի տուգանքը: 

ՀՀ վարչապետ Տիգրան Սարգսյանի հովանավորության տակ գտնվող հիմնադրամին տուգանելուց մեկ օր անց էլ Գագիկ Խաչատրյանը որոշել է պատժել Հայաստանի համահայկական հիմնադրամին: Այս իրողությունը հետաքրքիր է այնքանով, որ այդ հիմնադրամի հոգաբարձուների խորհրդի նախագահը Սերժ Սարգսյանն է: 

«Ժողովուրդ»-ը պարզեց, որ փետրվարի 28-ին «Հայաստան» համահայկական հիմնադրամի տնօրեն Արա Վարդանյանը թույլ է տվել մաքսային կանոնների խախտում: Ըստ մեզ հասած տեղեկությունների՝ Վարդանյանը Այրումի մաքսային կետով ՀՀ է ներմուծել ֆուտբոլի փչովի կաշվե գնդակներ, որի վերաբերյալ ընկերության տնօրեն Արա Վարդանյանը սահմանված ժամանակում այդպես էլ հայտարարագիր չի ներկայացրել: Արդյունքում հիմնադրամի տնօրենը Գագիկ Խաչատրյանի կողմից ենթարկվել է վարչական պատասխանատվության' տուգանվելով 50.000 դրամով: 

Շարունակությունը` «Ժողովուրդ»-ի այսօրվա համարում: