Պարզաբանվեց Կարբի և Օհանավան համայնքների ոռոգման հարցի հետ կապված շրջանառվող մի քանի լեգենդ

Կարբի և Օհանավան համայնքները սպասարկող ջրատարի վերանորոգումը չի նվազեցնի գյուղացիների՝ ոռոգման նպատակով օգտագործվող ջրի ծավալը: Համայնքների բնակիչները կունենան Ապարանի ջրամբարից ջրի բացթողնման ընթացքի և ծավալների նկատմամբ հսկողության գործուն մեխանիզմներ: Այդ մասին լրագրողների հետ հանդիպմանը նշեց ՀՀ տարածքային կառավարման նախարարի տեղակալ Արտաշես Բախշյանը: Ոռոգման ջրի հետ կապված գյուղացիների մտահոգություններն առավելապես տեղեկատվության պակասից են: «Մոտ 30 միլիոն խորանարդ մետր ջուր մշտապես պետք է պահվի ջրամբարում' գյուղացիների պարտեզներն ու տնամերձները ջրերու համար: Այդ քանակությունը գյուղացիների համար կարող է երաշխավորված լինել նրանց հսկողական մեխանիզմների շնորհիվ»,- նշեց փոխնախարարը:

Բախշյանը պարզաբանեց Կարբի և Օհանավան համայնքների ոռոգման հարցի հետ կապված շրջանառվող մի քանի լեգենդներ, որոնցից մեկն այն է, թե գյուղացու ջուրը կարող է պակասել: «Պետք է նկատի ունենալ, որ ամբողջ համակարգը ոռոգման համակարգ է և անգամ եթե հիդրոէլեկտրակայանը կառուցվի, բոլոր դեպքերում, այն կառուցվելու է ոռոգման համակարգի վրա և այն ժամանակ, երբ ոռոգման տվյալ համակարգը պետք է շահագործվի»,- նշեց փոխնախարարը՝ հավելելով, որ ՀԷԿ-ի կառուցման նախագիծը դեռ քննարկման փուլում է, և տվյալ պահին այդ մասին խոսք չկա:

Փոխնախարարը նշեց, որ երբ ՀԷԿ-ի կառուցման նախագիծը կազմվի, փորձաքննություններն անցկացվեն, այդ ժամանակ կանցկացվեն հանրային քննարկումներ և բոլորը կիրազեկվեն, թե ի՞նչ ՀԷԿ-ի և ի՞նչ հզորությունների մասին է խոսքը: «Հիմա ոչ ոք այդ մասին չգիտի, բայց բոլորն ակտիվ քննարկում են՝ հատկապես ՀԷԿ-ի հարցը»,- ասաց Բախշյանը՝ հավելելով, որ ներկայում խոսք է գնում արագահոսի վերակառուցման մասին, որովհետև, հանձնաժողովի գնատականներով, այնտեղ բազմաթիվ վթարային տեղամասեր կան:

Մյուս լեգենդն այն է, որ Ապարանի ջրամբարը կարող է կատարված աշխատանքների կամ վերակառուցումների պատճառով ամբողջովին դատարկվել: Բախշյանը նշեց, որ ջրամբարի ջրի մակարդակը ենթարկվում է հանրային հսկողության և չի կարող կտրուկ ու աննկատ նվազել: «Դատարկման պրոցեսը ժամանակ է պահանջում և չի կարող հանկարծակի լինել ու մարդկանց կանգնեցնել աղետի առաջ»,- ասաց Բախշյանը:

Ոռոգման համակարգի ուսումնասիրման հանձնաժողովը պարզաբանել է, որ ջրի հասանելիության տեխնիկական մակարդակը բավարար է, գյուղացիների և ՋՕ ընկերությունների փոխհարաբերությունները լավ են, հասույթները ձևավորվում են պատշաճ, երբեմն՝ որոշ ուշացումներով: Ընդհանուր առմամբ՝ վերջին տարիներին վերոնշյալ տարածքների ջրամատակարարումն իրականացվել է անխափան:

Արագածոտնի մարզի Օհանավան և Կարբի համայնքների ոռոգման համակարգի ուսումնասիրման նպատակով մարտի 7-ին ստեղծված հանձնաժողովը մարտի 14-ին և 17-ին հանդիպել է այդ գյուղերի բնակիչների հետ: Հանձնաժողովի աշխատանքների համար տրվել էր 10 օր, սակայն լրացուցիչ ուսումնասիրությունների համար կպահանջվի ևս 5 օր: